Aqtóbeniń Yrǵyz aýdanynda Ózbekstan azamattary mingen avtobýs isten shyqty. Olar Reseidiń Ýfa qalasyna bara jatqan, dep habarlaidy QazAqparat tilshisi oblystyq TJD baspasóz qyzmetine silteme jasap.
Aqtóbede Ózbekstan azamattary mingen avtobýs taǵy da isten shyqty. Bul joly olardy tótenshe jaǵdailar qyzmeti qutqaryp qaldy. Barlyǵy 53 jolaýshy din aman, olar jylytý beketterine jetkizildi.
«Keshe keshkilik «Aqtóbe - Yrǵyz» tasjolynyń 306 shaqyrymy, Qalybai aýylynan 24 shaqyrym jerde «Shymkent-Ýfa» baǵyty boiynsha jolǵa shyqqan «Setra» markili avtobýsy tehnikalyq aqaýǵa bailanysty jolda turyp qaldy. Avtobýs ishinde Qazaqstannyń úsh júrgizýshisi jáne 53 jolaýshy boldy. Jolaýshylardyń bári Ózbekstan azamaty. Onyń tórteýi bala. Aqtóbe oblysynyń TJD «Apattar meditsinasy ortalyǵy» kúshimen avtobýstaǵy 53 jolaýshy qutqaryldy. Olardyń ishinde 26 jolaýshy «JPÝ-10» jylytý beketine jáne 27 jolaýshy «Qalybai» trassalyq meditsinalyq qutqarý beketine ornalastyryldy», - dep habarlaidy oblystyq TJD baspasóz qyzmeti.
«Qazavtojol» qyzmeti tehnikalyq aqaýy bar avtobýsty Qalybai aýylyna jetkizdi. Al avtobýs júrgizýshileri jylytý beketine ornalastyryldy. Keiin avtobýstyń barlyq jolaýshysy Qalybai aýylynyń «Aiat» kafesine jetkizilgen. Negizinen qys maýsymy bastalǵannan beri 6 oqiǵa tirkelip, 147 adam qutqaryldy.
Eske salsaq, 18 qańtar kúni «Ikarýs» markaly avtobýs Shymkentten Reseidiń Qazan qalasyna bet alyp, túgel órtenip ketken bolatyn. Úkimetaralyq komissiia órttiń shamnan tutanǵanyn, avtobýs ishinde benzin toly arnaiy quty bolǵanyn anyqtady. Oqiǵa saldarynan 52 jolaýshy kóz jumyp, 5 adam jaralandy. Bul qaiǵyly oqiǵa da Yrǵyz aýdanynyń Qalybai aýylynan 10 shaqyrym qashyqtyqta tirkeldi.
