Aqtóbede 88 mektepte mektep formasyn saqtamai otyrǵan 340 oqýshy anyqtaldy. Jyl basynda júrgizilgen monitoring qorytyndysy osyndai. Óńirde oramal taqqan 32 oqýshy qyzdy ata-analary ózge aimaqtarǵa kóshirip áketken. Bul týraly búgin Aqtóbe oblystyq bilim jáne din isteri basqarmalarynyń basshylary málimdedi, dep habarlaidy Baq.kz aimaqtyq tilshisi.
Aqtóbede bastarynan oramalyn sheshpei, mektep formasyn saqtamai otyrǵan oqýshylardyń ata-analary jazalana bastady. 18 ata-anaǵa 5 AEK kóleminde aiyppul salynǵan. Olardyń beseýi qazir 12 myń teńge kóleminde aiyppuldaryn ótep, balalaryn mektepke qaita jiberdi.
«18 ata-anaǵa qatysty 5 AEK kóleminde aiyppul salyndy. Shalqar, Qarǵaly, Qobda, Alǵa, Hromtaý aýdandaryndaǵy mektep oqýshylaryn sabaqqa jibermegen ata-analardyń isi qolǵa alyndy. Qazir 5 ata-ana óz erkimen biýdjetke bekitilgen aiyppuldy tóledi. Osydan keiin 5 oqýshy mektepke qaitaryldy. Oqýshyǵa jaýapty ata-ana salynǵan aiyppuldy 30 kún ishinde tóleýi shart. Bul týraly barlyǵy habardar. Eger mundai ákimshilik quqyq buzýshylyq taǵy qaitalansa, is sotqa ketedi. Joǵaryda aitylǵan 18 materialdan ózge taǵy 3 material kelip tústi. Mektep basshylyǵy ata-analardyń ústinen shaǵym túsirip jatyr», - dedi Aqtóbe oblystyq bilim salasyndaǵy baqylaý departamenti basshysynyń mindetin atqarýshy Janat Muhambetalina.
Aqtóbede jyl basynda monitoring qorytyndysy boiynsha mektep formasyn saqtamaǵan 340 oqýshy anyqtalǵan edi. Qazir talaptar men túsindirý jumystarynyń nátijesinde oramal taqqan oqýshylarsany 72-ge azaiǵan. 268 qyz bala mektepke qaita bardy.
«QR Bilim jáne Ǵylym ministriniń 14 qańtar 2016 jylǵy №26 buiryǵy negizinde mektep formasyn saqtaý barlyq ata-analarǵa birdei talap etildi. Bul boiynsha jumystar jasalyp jatyr. Ár azamattyń óz pikirin bildirýge quqyǵy bar, degenmen 1 qańtar 2018 jyly oblys boiynsha mektep formasyn 340 oqýshy saqtamaǵan bolatyn. 13 naýryzda sonyń 268-i qaitadan mektep formasyn saqtap, óz partalarynda otyr. Qalǵan balalarmen qazir jumys jasalýda. Suraqtar kóp. Zań buzylyp turǵan joq. Tek buiryqty sol balalarǵa jaýapty ata-ana oryndaýǵa mindetti. Al, ol oryndalmai otyr» , - deidi oblystyq bilim basqarmasynyń basshysy Lázzat Orazbaeva.
Oramalyn sheshpegen 32 oqýshyny ata-anasy ózge óńirlerge alyp ketse, 10-y Almaty qalasynda. Qalǵandary Ońtústik Qazaqstan oblysynydaǵy mektepterge aýysqan. Barlyǵy da biylǵy 1 qańtarda mektep formasyn saqtamaǵan oqýshylar. Mamandar eki toqsan boiy sabaqqa barmaǵan qyz balalardyń máselesi týraly ministrlikke hat joldaǵan.
«Qashyqtyqtan oqytý eldegi mektep talaptaryna qaishy. Al mektepke kelmei otyrǵan 72 balanyń arasynda eki toqsan boiy sabaqqa barmaǵandar bar. Bul jóninde biz QR Bilim jáne ǵylym ministrligine birneshe ret hat joldadyq. Qazir jaýabyn kútip otyrmyz. Bul oqýshylardyń synyp jetekshileri olarǵa telefon arqyly kómektesip jatyr, biraq balalar mektepke kelmegendikten, tolyq bilim berý standartyn qabyldamaǵandyqtan, eki toqsan boiy kóshirilmei otyr. Eger eki toqsan boiy bilim almasa, odan ári zań boiynsha synyptan synypqa kóshirilmeidi», - dedi Lázzat Orazbaeva.
Aita keteiik, balalary mektepke kire almai otyrǵan ata-analar Elbasy Nursultan Nazarbaevtyń, premer-ministrdi Baqytjan Saǵyntaevtyń atyna úndeý jazyp, taratqan edi. Jaýapty mamandar buǵan qatysty pikir bildirdi.
«Elbasymyzdyń atyna jergilikti azamattar «Aqtóbe oblysynda musylmandar qysymshylyqqa ushyrap jatyr» degen úndeý taratylǵan edi. Bizdiń din isteri basqarmasy – memlekettik mekeme. Bizge aryz eki kún buryn ǵana tústi. Úndeý jazǵan adamdardyń birnesheýimen áńgimelesip, túsindirý jumystaryn júrgizdik. Arnaiy aryz bizge buǵan deiin túspedi», - dedi oblystyq din isteri basqarmasynyń basshysy Joldas Qalmaǵambetov.
