ZiL avtokóliginiń tizgininde bolǵan 48 jastaǵy Amantai Úsenov Aqtóbe qalasynda 11 jastaǵy oqýshyny qaǵyp ketti, - dep habarlaidy kaz.tengrinews.kz "Diapazon" gazetine silteme jasap. Oqiǵa 2018 jyly 31 qańtarda 12:55-te bolǵan.
Bersiev pen Nekrasov kósheleriniń qiylysynda jaiaý júrginshilerge arnalǵan jolda júrgizýshi oqýshyny qaǵyp ketti. Jol-kólik oqiǵasynan keiin oqýshy oblystyq klinikalyq aýrýhanaǵa jetkizildi. Alaida 11 jastaǵy bala alǵan jaraqatynyń tym aýyr bolýyna bailanysty birneshe saǵattan soń qaitys boldy.
Sotta júrgizýshi óz kinásin moiyndady. Sol kúni ol óziniń ZiL kóligimen apatqa ushyraǵan avtokólikti Zarechnyi aýylyna alyp bara jatqanyn jáne jyldamdyǵy saǵatyna 30 shaqyrym bolǵanyn aitty. "Avtoservis" aialdamasyna jaqyndaǵan kezde ol jyldamdyqty túsirgenin aitty. Jaiaý júrginshige arnalǵan jolǵa úsh metr qalǵanda júrgizýshi jan-jaǵyna qaramastan júgirip ótpekshi bolǵan balany kórgen.
Júrgizýshiniń aitýynsha, ol áreket etip úlgermegen. Kólikten shyǵa sala ol balaǵa kómektesýge asyqqan. Bala asfaltte es-túsin bilmei jatqan. Jedel járdemdi kútpei, ol basqa bir kólikpen balany aýrýhanaǵa jetkizgen. Sodan keiin ol patrýldik kólikpen oqiǵa ornyna qaityp kelgen. Sot ony kináli dep taýyp, oǵan eki jyl bas bostandyǵynan shartty túrde aiyrdy. Sonymen qatar oǵan kólik júrgizýge tyiym saldy.
