زيل اۆتوكٶلٸگٸنٸڭ تٸزگٸنٸندە بولعان 48 جاستاعى امانتاي ٷسەنوۆ اقتٶبە قالاسىندا 11 جاستاعى وقۋشىنى قاعىپ كەتتٸ, - دەپ حابارلايدى kaz.tengrinews.kz "دياپازون" گازەتٸنە سٸلتەمە جاساپ. وقيعا 2018 جىلى 31 قاڭتاردا 12:55-تە بولعان.
بەرسيەۆ پەن نەكراسوۆ كٶشەلەرٸنٸڭ قيىلىسىندا جاياۋ جٷرگٸنشٸلەرگە ارنالعان جولدا جٷرگٸزۋشٸ وقۋشىنى قاعىپ كەتتٸ. جول-كٶلٸك وقيعاسىنان كەيٸن وقۋشى وبلىستىق كلينيكالىق اۋرۋحاناعا جەتكٸزٸلدٸ. الايدا 11 جاستاعى بالا العان جاراقاتىنىڭ تىم اۋىر بولۋىنا بايلانىستى بٸرنەشە ساعاتتان سوڭ قايتىس بولدى.
سوتتا جٷرگٸزۋشٸ ٶز كٸنەسٸن مويىندادى. سول كٷنٸ ول ٶزٸنٸڭ زيل كٶلٸگٸمەن اپاتقا ۇشىراعان اۆتوكٶلٸكتٸ زارەچنىي اۋىلىنا الىپ بارا جاتقانىن جەنە جىلدامدىعى ساعاتىنا 30 شاقىرىم بولعانىن ايتتى. "اۆتوسەرۆيس" ايالداماسىنا جاقىنداعان كەزدە ول جىلدامدىقتى تٷسٸرگەنٸن ايتتى. جاياۋ جٷرگٸنشٸگە ارنالعان جولعا ٷش مەتر قالعاندا جٷرگٸزۋشٸ جان-جاعىنا قاراماستان جٷگٸرٸپ ٶتپەكشٸ بولعان بالانى كٶرگەن.
جٷرگٸزۋشٸنٸڭ ايتۋىنشا, ول ەرەكەت ەتٸپ ٷلگەرمەگەن. كٶلٸكتەن شىعا سالا ول بالاعا كٶمەكتەسۋگە اسىققان. بالا اسفالتتە ەس-تٷسٸن بٸلمەي جاتقان. جەدەل جەردەمدٸ كٷتپەي, ول باسقا بٸر كٶلٸكپەن بالانى اۋرۋحاناعا جەتكٸزگەن. سودان كەيٸن ول پاترۋلدٸك كٶلٸكپەن وقيعا ورنىنا قايتىپ كەلگەن. سوت ونى كٸنەلٸ دەپ تاۋىپ, وعان ەكٸ جىل باس بوستاندىعىنان شارتتى تٷردە ايىردى. سونىمەن قاتار وعان كٶلٸك جٷرگٸزۋگە تىيىم سالدى.
