Qazaqstandyq-reseilik birlesken komissiianyń aldyn ala málimetine sáikes, Aqtóbe oblysynda tabylǵan zymyrannyń qaldyǵy – atmosferanyń joǵarǵy qabatyn zertteýge baǵyttalǵan geofizikalyq zymyrannyń qaldyǵy bolyp otyr. Qorǵanys ministrligi osyndai aqparat taratty, dep habarlaidy "Ult aqparat".
«Zymyran qulaǵan orynnyń radiatsiialyq mólsheri ólshenip, topyraqtyń, jaýyn-shashyn men qardyń synamasy alyndy. Qaldyqtar ekologiiaǵa da, Aqtóbe oblysynyń turǵyndaryna da eshqandai qaýip tóndirmeidi. Gamma-sáýlelerdiń mólsheri jergilikti jerdiń tabiǵi radiatsiialyq aiasynan aspaidy», - dep habarlaidy Qorǵanys ministrliginen.
Ministrlik sonymen qatar, áleýmettik jelilerge silteme jasala otyryp, reseilik BAQ-qa taratylǵan aqparatty joqqa shyǵardy. Reseilik BAQ quraldarynda qaldyqtardyń «Iskander-M» zymyranyna tiesili ekeni jazylǵan edi.
«Qazaqstan men Resei arasynda 1995 jyly jasalǵan memleketaralyq kelisimge sáikes, QR aýmaǵyndaǵy poligondardy Resei Federatsiiasy jalǵa alyp otyrǵanyn eske salǵymyz keledi. Ministrlik, eń birinshi kezekte, poligondardy paidalanýda qaýipsizdik sharalaryn kúsheitý boiynsha kelisimge túzetý engizýdi bastama etip kóteredi», - delingen habarlamada.
Eske sala ketsek, osydan birneshe kún buryn QR Qorǵanys ministrligi josparly oqý-jattyǵýlary kezinde qulaǵan zymyran synyǵyna bailanysty túsinik bergen bolatyn.
