قازاقستاندىق-رەسەيلٸك بٸرلەسكەن كوميسسييانىڭ الدىن الا مەلٸمەتٸنە سەيكەس, اقتٶبە وبلىسىندا تابىلعان زىمىراننىڭ قالدىعى – اتموسفەرانىڭ جوعارعى قاباتىن زەرتتەۋگە باعىتتالعان گەوفيزيكالىق زىمىراننىڭ قالدىعى بولىپ وتىر. قورعانىس مينيسترلٸگٸ وسىنداي اقپارات تاراتتى, دەپ حابارلايدى "ۇلت اقپارات".
«زىمىران قۇلاعان ورىننىڭ رادياتسييالىق مٶلشەرٸ ٶلشەنٸپ, توپىراقتىڭ, جاۋىن-شاشىن مەن قاردىڭ سىناماسى الىندى. قالدىقتار ەكولوگيياعا دا, اقتٶبە وبلىسىنىڭ تۇرعىندارىنا دا ەشقانداي قاۋٸپ تٶندٸرمەيدٸ. گامما-سەۋلەلەردٸڭ مٶلشەرٸ جەرگٸلٸكتٸ جەردٸڭ تابيعي رادياتسييالىق اياسىنان اسپايدى», - دەپ حابارلايدى قورعانىس مينيسترلٸگٸنەن.
مينيسترلٸك سونىمەن قاتار, ەلەۋمەتتٸك جەلٸلەرگە سٸلتەمە جاسالا وتىرىپ, رەسەيلٸك باق-قا تاراتىلعان اقپاراتتى جوققا شىعاردى. رەسەيلٸك باق قۇرالدارىندا قالدىقتاردىڭ «يسكاندەر-م» زىمىرانىنا تيەسٸلٸ ەكەنٸ جازىلعان ەدٸ.
«قازاقستان مەن رەسەي اراسىندا 1995 جىلى جاسالعان مەملەكەتارالىق كەلٸسٸمگە سەيكەس, قر اۋماعىنداعى پوليگونداردى رەسەي فەدەراتسيياسى جالعا الىپ وتىرعانىن ەسكە سالعىمىز كەلەدٸ. مينيسترلٸك, ەڭ بٸرٸنشٸ كەزەكتە, پوليگونداردى پايدالانۋدا قاۋٸپسٸزدٸك شارالارىن كٷشەيتۋ بويىنشا كەلٸسٸمگە تٷزەتۋ ەنگٸزۋدٸ باستاما ەتٸپ كٶتەرەدٸ», - دەلٸنگەن حابارلامادا.
ەسكە سالا كەتسەك, وسىدان بٸرنەشە كٷن بۇرىن قر قورعانىس مينيسترلٸگٸ جوسپارلى وقۋ-جاتتىعۋلارى كەزٸندە قۇلاعان زىمىران سىنىعىنا بايلانىستى تٷسٸنٸك بەرگەن بولاتىن.
