Aqtóbede Qarǵaly ózeni de tasi bastady. Ótken táýlikte Qarǵalynyń jaǵalaýyndaǵy Keńes Nokin, Sadovyi aýyldary men túrli saiajai ujymdarynan 400-ge tarta turǵyn evakýatsiialanǵan. Bul týraly Azattyqqa Aqtóbe oblystyq tótenshe jaǵdailar departamentiniń (TJD) baspasóz qyzmeti habarlady.
Sadovyi aýylyna tasqyn sý 18 sáýir kúni saǵat 10 shamasynda kele bastaǵan. Kishkentai balalary men qujattaryn qaýipsiz jerge kóshirip, ózderi úi-jailaryna alańdaǵan turǵyndar túnimen uiqy kórmegenderin aitady. Aýyl turǵyny Ǵaziza Sarbópinanyń sózine qaraǵanda, keminde 15 úi sýǵa ketken.
- Parasat, Báisheshek kóshelerindegi birneshe úidi sý basty. Sol kóshedegi Maksimovtar, Otarovtar otbasy býynyp-túiinip týystaryna ketti. Úilerin sý basqan biraz adam Aqtóbedegi №61 mektepti panalap otyr, -deidi Janat Arzymbetova esimdi turǵyn.
Ótken túni Aqtóbeden 35 kilometr qashyqtyqtaǵy Sadovyi aýylyna barǵan Azattyq tilshisi Báisheshek kóshesindegi asfaltty ekskavatordyń qazyp jatqanyn kórdi. Turǵyndardyń aitýynsha, bul asfalt aýylǵa osydan eki jyl buryn tóselgen.
- Tas joldy buzyp, aryq jasaýǵa májbúrmiz. Olai etpesek, búkil aýyldy sý basý qaýpi bar. Qarǵalynyń sýy arnasyna syimai, Sadovyi aýylyna jaiyla bastady. Sol sýdy ózen arnasyna qaitadan burý úshin asfaltty qazyp jatyrmyz, - dedi Aqtóbe qalalyq tótenshe jaǵdailar bóliminiń basshysy Bekbolat Nurashev.
Aqtóbe oblystyq TJD málimetinshe, ótken táýlikte Sadovyi aýyly men oǵan irgeles Solnyshko, Neftiannik saiajai ujymdarynda 47 úi men aýlany sý basqan.
