Aqtóbe qalalyq meshiti din ókilderi men teologtardyń, jat aǵym jeteginde júrgenderdiń arasynda boýlingten jarys ótkizdi. Jarysqa barlyǵy 17 komanda qatysyp jatyr, dep habarlaidy QazAqparat tilshisi.
Aqtóbe qalasyndaǵy 10 meshittiń imamy men jamaǵat, «Ańsar» aqparattyq - taldaý ortalyǵynyń teologtary, jat aǵym jeteginde júrgender búgin boýling oinap, ózara pikir almasýǵa kelisti.
«Namazhandardyń aýyzbirshiligin arttyrý úshin biz boýlingke keldik. Boýlingke Muǵaljar aýdany, Qandyaǵash qalasynda turatyn eki jigitti alyp keldim. Ekeýi de jat aǵym jeteginde júr. Olardyń biri as iship bolǵan soń bet sipap, bata berýdi burys sanaidy. Jastardyń kózqarasyn túzep, oiyn ózgertý úshin kópshilik arasyna shaqyrdyq. Jigitter qarsy bolmai, kelisim berdi. Jat aǵym men dástúrli joldy ustanatyndar bir jerde kezdesse, bári jaqsy jaǵyna ózgeredi», - dedi Qandyaǵash ortalyq meshitiniń naib imamy Ásemhan Erǵazin.
Meshitke baryp, namaz oqityndar da shaqyrýdy qabyl alǵan. Keibiri buryn boýling oinaǵan, keibiri aýyr dopty búgin qolyna alǵash ustap tur.
«Stýdent kezde boýling oinadym. Aqjar aýylyndaǵy meshit imamy boýling oinaityn jamaǵatty shaqyrǵanda birden kelisim berdim. Bul jaqsy oi eken», - meshit jamaǵaty Janas Imanǵazin.
