Aqtóbe qalasyndaǵy Sazdy jáne Aqtóbe sý qoimasy qar sýyna toldy. Qazir sý Elek jáne Sazdy ózenderine jiberilip, ózen mańyndaǵy saiajailardy sý basty, dep habarlaidy Ult.kz tilshisi QazAqparat agenttigine silteme jasap.
Aqtóbe qalasynda tótenshe jaǵdai jariialanyp, arnaiy qyzmet turǵyndarǵa habarlandyrý berdi. Sebebi, Elek jáne Sazdy ózeniniń arnasy tolyp, sý jaǵaǵa shyqty. Qazirgi ýaqytta ózen mańyndaǵy baý-baqsha ujymdaryna qonystanǵan adamdar qaýipsiz jerge kóshirilip jatyr.
«Qaladaǵy turǵyn úilerdi sý baspaidy degen boljam bar. Biraq saiajaiǵa qonystanǵan adamdardyń qaýipsiz jerge kóshýine týra keledi. Sebebi, Aqtóbe jáne Sazdy sý qoimasy tolyp, sý Elek, Sazdy ózenderine jiberilip jatyr. Al Qarǵaly sý qoimasy 66 paiyzǵa toly. Sonymen qatar, Jińishke, Tamdy, Jaman Qarǵaly, Bulaq ózenderi arnasynan asty»,- dedi oblystyq tótenshe jaǵdailar departamentiniń basshysy Baýyrjan Syzdyqov.
Qutqarýshylar 45 baý-baqsha ujymyndaǵy myńdaǵan úidi sý basqanyn anyqtady. Qazir turǵyndar qaýipsiz jerge kóshirilip jatyr. Al kóshýden bas tartqan adamdar arnaiy qolhat jazyp, baspanalarynda qalýdy jón kórgen.
«Elek ózeni mańyndaǵy baý-baqshadan sý sorylmaidy. Sebebi, ózen jaǵasyndaǵy sýdy sorý esh nátije bermeidi. Inertti materialdar da tasylmaidy. Bul da nátije bermeidi.
Keshe 600 úige habarlandyrý berip, ózen tasýy múmkin dep aittyq. Qutqarýshylar qaýip bar ekenin eskertti. Biraq 522 adam qaýipsiz jerge kóshýden bas tartyp otyr. Barlyǵy 227 adam qaýipsiz jerlerge kóshirildi, 6 adam ýaqytsha ornalastyrý beketterinde, olardyń ishinde eki bala bar. 129 adam týystarynyń úilerine ornalasty», - dedi B. Syzdyqov.
Tótenshe jaǵdailar qyzmeti keshe eriktilerdiń kómegimen kvadrokopter arqyly qala mańyn sholyp shyqty. Al búgin Aqtóbe qalasynda jańbyr jaýyp tur. Tótenshe jaǵdailar qyzmeti ózen sýynyń arnasy áli de kóterilýi múmkin dep boljap otyr.
