Aqtóbe oblysynda bir aptada 11 toi iesine 7 million teńdegen astam aiyppul salyndy, dep habarlaidy "Ult aqparat".
Ótken táýlikte óńirde 10 adamnan koronavirýs infektsiiasy anyqtaldy. Onyń altaýy qala turǵyny.
Oblystyń bas memlekettik sanitariialyq dárigeri Nursulý Berkimbaevanyń habarlaýynsha, tórteýi zeinetker. Bos ýaqyty kóp, alańsyz júrgen olar kóbine qonaqqa baryp, dúken aralap dertke shaldyqqan. Al tórteýi Mártók aýdanynan. Onyń ishinde ekeýi Reseiden kelgen Jambyl oblysynyń turǵyny.
Aýrýdyń taraý deńgeii bir kúnde 0,3% qurady. Jalpy oblysta 3395 jaǵdai tirkeldi. Adamdardyń 97 % jýyǵy jazylyp shyqty. Úi karantininde 263 aqtóbelik jatyr.
«3-9 qarasha kúnderi aralyǵynda meiramhanalarda 11 toi ótkizilgen. Olarǵa 7,2 million teńgege aiyppul salyndy. Qazir oblysta epidahýal turaqty. Eger biz betperde taǵyp, araqashyqtyqty saqtasaq, jaǵdai qalypty bolady. Sondai-aq óńirde oqýshylardan COVID-19 anyqtalmady. Oqýshy sany 300-den aspaityn mektepter dástúrli oqý tártibine kóshedi. Qazir Qaýly daiyndalyp jatyr», - dedi Aqtóbe oblysynyń bas memlekettik sanitariialyq dárigeri Nursulý Berkimbaeva.
Aita keteiik, óńirde 2 balabaqsha balasynan koronavirýs infektsiiasy anyqtalyp, ekeýi de karantinge jabylǵan. Al top balalary men tárbieshiden PTR test alynǵan.
