Aqtóbe qalasynda aqyn Abaiǵa eskertkish ornatyldy, dep habarlaidy "Ult aqparat".
Aqtóbe qalasynda «Ádebiet. Rýh. Qoǵam» respýblikalyq forýmy ótti. Oǵan Qazaqstan Jazýshylar Odaǵynyń tóraǵasy Ulyqbek Esdáýlet, aqyn Aqushtap Baqtygereeva, ShQO Abai aýdanynyń ákimi Jarqynbek Baisabyrov qatysty.
Ádebi keshten soń uly oishyl, qazaqtyń bas aqyny Abai Qunanbaiulynyń eskertkishi ashyldy.
«Abaidyń óleńderi men qara sózderinde ult bolmysy, bitimi, turmysy, tirshiligi, dúnietanymy, rýhy kórinis taýyp keledi. Biylǵy mereitoi elge oi salatyn, taǵylymy mol naqty sharalarmen jalǵasýda. Álemge tanymal bas aqynymyzdyń eńbegin halyq bolyp ulyqtaý memleketimizdiń mereiin arttyrady. Uly oishyldyń asyl murasyn ardaqtaý jáne jan-jaqty dáripteý – barshamyzdyń mindetimiz. Ol úshin búgingi býyn Abai murasynan nár alyp, rýhani kemeldenýi qajet. Bul úrdis Abai jylynan keiin de jalǵasyn tabatyn bolady» - dedi oblys ákimi Ońdasyn Orazalin.
Eskertkishtiń ashylý saltanatynda Qazaqstan Jazýshylar Odaǵynyń tóraǵasy U.Esdáýlet, aqyn A.Baqtygereeva quttyqtaý sóz sóilep, QR Mádeniet jáne sport ministriniń keńesshisi E.Jurynbaev ministrdiń arnaiy quttyqtaý sózin jetkizdi. ShQO Abai aýdanynyń ákimi J.Baisabyrov uly aqynǵa qurmet kórsetip jatqan aqtóbelik aǵaiynǵa óz alǵysyn bildirdi.
«Uly Abai bizdiń ultymyzdyń uly ustazy, adastyrmas aqylshysy, aspanda jarqyraǵan temirqazyq juldyzy. Onyń shyǵarmalary bizdiń ulttyq ideologiiamyzdyń quramdas bóligine ainaldy. Biyl Qazaqstan jáne túrki halyqtary úshin Abai jyly boldy. Sonymen birge Jazýshylar Odaǵynyń usynysymen Abai kúni bekitildi. Abai jyldary qiyn-qystaý kezde halyqty aman alyp shyqty. Táýelsizdik tusynda da óz baǵyt-baǵdaryn Abaiǵa qarap aiqyndady», - dedi U.Esdáýlet.
Atap óteiik, eskertkish Aqtóbe qalasyndaǵy Abai dańǵyly men Eset batyr kóshesiniń qiylysynda ornalasqan. Eskertkishtiń avtorlary - Qazaqstan Respýblikasynyń Mádeniet qairatkeri, belgili músinshi, Qazaqstan sýretshiler Odaǵynyń múshesi Toqtar Ermekov jáne qalamyzdaǵy Áiteke bi, Jalańtós Bahadúr, Bókenbai batyr, Áliia syndy tarihi eskertkishteriniń avtory Jeńis Jubanqosov.
Eskertkish Ekaterinbýrg qalasynda jasalynǵan. Eskertkishtiń jalpy biiktigi - 6,20 metr. Buǵan deiin Aqtóbede Abai eskertkishi bolmaǵan.
«Eskertkishi keshigip bolsa da ashyldy. Bir jaǵynan qýanamyz, ókinish te bar. Danyshpany, oishyly joq ulttyń rýhy tómen bolady. Egemendikke raqmet. Ata-baba armandaǵan ýaqyt keldi. Sol egemendiktiń arqasynda búgin biz babamyzǵa eskertkish qoiyp, óz ana tilimizde bir-birimizdi quttyqtap jatyrmyz. Búgin biz Abaiǵa emes, ózimizge emes, bir bolashaqqa jumys istedik. Nemere men shóbere osy jerden ótkende «danyshpany bar ulttyń balasymen» dep óssin», - dedi A.Baqtygereeva.
