Aqtóbe oblysy Muǵaljar aýdany Jaǵabulaq aýyly mańyndaǵy Atjaqsy ózeninde balyq qyrylyp jatyr. Bul týraly oqiǵa ornynan túsirilgen videony joldap, aty-jónin atamaýdy ótingen balyqshy aitty. Balyq qyrylǵan Atjaqsy ózeni Jańajol munai kenishine jaqyn mańda ornalasqan, dep habarlaidy Azattyq tilshisi.
Jem ózeniniń Atjaqsy salasynda balyq qyrylyp jatqanyn Muǵaljar aýdanynyń ákimi Asqar Sheriiazdanov ta rastady. Sheriiazdanovtyń sózinshe, balyq qyrylyp jatqany jaily habar ákimdikke 3 qarasha kúni keshkilik jetken.
- Balyq Muǵaljar aýdany Jaǵabulaq aýylynan 42 shaqyrym jerde qyrylǵan. Bul – Atjaqsy ózeniniń Jemge quiatyn tusy. 4 qarasha kúni oqiǵa ornyna Aqtóbe oblystyq ekologiia departamenti men oblystyq orman, ańshylyq basqarmasynyń ókilderi keldi. Qazir olar ózen sýyn tekserip jatyr, - dedi Muǵaljar aýdanynyń ákimi Asqar Sheriiazdanov.
Aqtóbe oblystyq ekologiia departamenti basshysynyń orynbasary Erbolat Qojyqovtyń sózinshe, balyqtyń neden qyrylǵanyn anyqtaý úshin kem degende bes táýlik qajet. Tabiǵatqa kelgen shyǵyn mólsheri de sol kezde belgili bolady. Qazir ózen mańynda birneshe basqarmanyń mamany men zertteý laboratoriiasy jumys istep jatyr. Olar aldyn-ala zertteý qorytyndysyn ekologiia departamentine 4 qarasha kúni tústen keiin telefonmen habarlaǵan.
Aqtóbe oblystyq ekologiia departamenti "ózenge Jańajol munai kenishinen óndiris qaldyǵy tógilmegen" dep sanaidy. Muǵaljarda júrgen mamandar balyq qyrylýynyń aldyn-ala sebebi dep qýańshylyqty ataǵan.
- Biylǵy qýańshylyqtan ózenniń tabanynda qalǵan sý borsyp, quramynda ammiak kóbeiip ketken. Ózen sýynda kislorod az. Balyq sodan qyrylǵan bolýy múmkin, - deidi Erbolat Qojyqov.
Qazaqstandaǵy ózender men kólderde buǵan deiin balyq qyrylý faktisi tirkelgen. Máselen, byltyr jeltoqsanda Atyraý oblysyndaǵy Jaiyq ózeninde 9 tonna tonna balyq ólgen. Keiin Atyraý oblystyq politsiia departamenti balyq qyrylýyna bailanysty "Balyq qorlaryn qorǵaý erejelerin buzý" jáne "Sýdy lastaý, qoqystaý nemese sarqý" baptary boiynsha eki qylmystyq is qozǵaǵan. Qylmystyq is boiynsha "Atyraý Sý arnasy" kommýnaldyq-sharýashylyq kásipornynyń burynǵy direktory Rýslan Qurmetov, onyń orynbasary Viktor Sýshenko jáne sý tazartý stantsiiasynyń bastyǵy Mihail Chýrsinge aiyp taǵylǵan. Qazir sot júrip jatyr.
Al biyl tamyzda Soltústik Qazaqstan oblysy Tulymbai kólinde móńke balyqtar qyrylǵan.
