Foto: ashyq derekkóz
Alǵa aýdany politsiia bóliminiń 28 jastaǵy qyzmetkeri para alý deregi boiynsha sottaldy, dep habarlaidy Ult.kz «Diapazon» basylymyna silteme jasap.
Oqiǵa «Aqtóbe-Astrahan» tas jolynda bolǵan. Aiyptalýshy óziniń seriktesimen birge patrýldeý kezinde Alǵa qalasynyń kireberisinde «Hyundai Accent» kóligin toqtatqan. Kólik tizgininde áiel adam bolǵan. Tártip saqshylary onyń ishimdik ishkenine kúdiktenip, qyzmettik kólikke otyrýdy jáne meditsinalyq saraptamadan ótý qajettigin habarlaǵan.
Sot barysynda aiyptalýshy óz kinásin múldem moiyndamady. Onyń nusqasy boiynsha, júrgizýshi áiel kólikten shyǵa sala viski ishkenin ózi aitqan, biraq politseiler odan eshqandai iis sezbegen.
«Oǵan saraptamadan ótý kerektigin, eger bári jaqsy bolsa, bosatylatynyn túsindirdik. Aýrýhanada dáriger ornynda bolmady, sondyqtan saraptama keiinirek júrgizildi. Qorytyndy boiynsha ol saý bolyp shyqty», – dedi sottalýshy.
Politseidiń aitýynsha, júrgizýshi buǵan deiin oǵan 100 myń teńgeni ózi usynǵan, biraq ol aqshany almaǵan. Al paranyń bir bóligi (45 myń teńge) onyń páterinen qalai tabylǵanyn túsindire almady. Ol sotta ózin tintý kezinde aldap qaqpanǵa túsirgenin málimdep, sýdiadan ózin aqtaýdy surady.
Alaida, sotta kýálik bergen jábirlenýshi áiel oqiǵanyń múldem basqasha bolǵanyn aityp berdi. Onyń sózinshe, ol tańerteń az ǵana martini ishkenin, biraq kólik júrgizgen kezde múldem saý bolǵanyn moiyndaǵan.
«Men olarǵa taýar tasyp, jalǵyzbasty ana retinde aqsha tabatynymdy aittym. Júrgizýshi kýáliginen aiyryp jibere me dep qorqyp, eskertýmen shektelýin ótindim», – dedi jábirlenýshi.
Osydan keiin ol politseiden máseleni oń sheshý úshin ne qalaitynyn suraǵan. Sonda tártip saqshysy telefonyna «100» degen sandy terip kórsetip, qolma-qol aqsha tabýǵa bir saǵat ýaqyt bergen.
Bul talaptan soń júrgizýshi birden Sybailas jemqorlyqqa qarsy qyzmetke habarlasyp, mobildi qosymsha arqyly aryz jibergen. Ol bankomattan aqshany sheship, kýpiýralardy sýretke túsirip, jemqorlyqqa qarsy qyzmetkerge jóneltken.
Osydan keiin ǵana ol meditsinalyq saraptamadan ótip, «saý» degen qorytyndy alǵan.
Sol qorytyndymen politseidiń qyzmettik kóligine qaita otyrǵan. Tártip saqshysynyń nusqaýymen 100 myń teńgeni kóliktiń qolǵapsalǵyshyna qaldyrǵan.
«Ol aqshany alǵan soń, endi maǵan barlyq jerde jasyl sham bolatynyn aitty», – dep túsindirdi jábirlenýshi sotta.
Sot is materialdaryn zerttei kele, júrgizýshi áieldiń ýájin tolyq rastady. Nátijesinde 28 jastaǵy politsiia qyzmetkeri 100 myń teńge para talap etkeni úshin kináli dep tanyldy.
Ol 7 jylǵa bas bostandyǵynan aiyryldy jáne memlekettik qyzmette ómir boiy jumys isteý quqyǵynan aiyryldy.
Sonymen qatar, sot sottalýshyny jábirlenýshiniń advokatqa jumsaǵan shyǵyny retinde bir million teńge tóleýge mindettedi.
