Aqtóbede koronavirýs infektsiiasyn juqtyrǵan 1 210 adam aýrýhanada jatyr. Onyń 900-den astamy Aqtóbe qalasynda, dep habarlaidy "Ult aqparat".
Bir táýlikte taǵy 336 adamnan koronavirýs infektsiiasy anyqtaldy. Kóbi Aqtóbe qalasynan. Sonymen birge Muǵaljar, Alǵa aýdardarynda da onnan astam adam aýyryp, dáriger kómegine júgingen. Aýrýshańdyqtyń ósý deńgeii 1,5 % asty.
«Oblystyq klinikalyq infektsiialyq aýrýhanada 155, Aqtóbe meditsina ortalyǵynda 79, Aqtóbe oblystyq ftiziopýlmonologiialyq ortalyqta 446, Temirjol aýrýhanasynda 206 naýqas bar. Aýdandarda 315 adam em qabyldap jatyr. Ásirese Qobda, Hromtaý, Alǵa, Baiǵanin, Muǵaljarda kóp. Naýqastardyń 105-i jansaqtaý bólimine jatqyzylǵan. Sonymen birge 417 balaǵa da koronavirýs infektsiiasy diagnozy qoiyldy. Onyń 17-i aýrýhanaǵa jatty. Al 174 júkti áieldiń 95-i aýrýhanada. Infektsiialyq kereýet júktemesi 65,8 % qurap otyr», - dedi oblystyq densaýlyq saqtaý basqarmasy bóliminiń bas mamany Ásiia Tirijanova. Aqtóbe oblysynda 32 adam koronavirýs infektsiiasyn qaita juqtyrǵan. Olar jazylǵan soń ońaltý sharasyna qatysady.
«Vaktsina qabyldaǵandardyń 483-i virýs juqtyryp, aýyryp qaldy. Al vaktsinanyń eki komponentin saldyrǵan 4 adam tamyz aiynda kóz jumdy»,- dedi Ásiia Tirijanova.
Aita keteiik, 259 myńǵa jýyq adam vaktsinanyń I komponentin, al 195 myńǵa jýyǵy II dozasyn da saldyrdy. Qazirgi kezde virýs juqtyryp, PTR synamasy oń mán kórsetken naýqastardyń 72 paiyzy jazyldy. Degenmen úi karantinindegi adam sany kún sanap artyp barady. Búginde olardyń sany 9 myńnan asty.
