Foto: Gov.kz
Atyraý mańyndaǵy ortaǵasyrlyq «Aqtóbe-Laeti» qalashyǵynda júrgizilgen arheologiialyq qazba jumystary kezinde sirek kezdesetin kúmis tiyndar tabyldy. Qazbany H.Dosmuhamedov atyndaǵy Atyraý ýniversitetiniń arheologtary júrgizgen, dep habarlaidy Ult.kz.
Arheologtardyń aitýynsha, tabylǵan kóne tiyndar Altyn Orda bileýshisi Meńgý-Temir hannyń tusynda soǵylǵan. Reseilik nýmizmatik ǵalym Pavel Petrov tiynnyń bederli jazýlaryn zerttep, onyń tarihi qundylyǵy óte joǵary ekenin málimdegen. Monetanyń bir betinde Meńgý-Temir hannyń jeke tańbalary beinelense, ekinshi betinde Qytai ieroglifteri kezdesedi.
«Bul HIII ǵasyrdyń ekinshi jartysyna tiesili tiyn. Qytaisha tańbalar Shyńǵys hannan taraǵan Qubylai men Shaǵatai urpaqtary arasyndaǵy saiasi qaqtyǵystar kezinde qolǵa túsken tutqyn Nomýhanmen bailanysty bolýy múmkin», – deidi arheolog Amangeldi Muǵaýuly.
Foto: Gov.kz
Arheologtar sonymen qatar qalashyqtan bútin kúiinde saqtalǵan kóne taǵara ydysyn da arshyp alǵan.
Biylǵy maýsymdaǵy arheologiialyq jumystarǵa tapsyrys berýshi – Atyraý oblystyq tarihi-mádeni muralardy zertteý ortalyǵy. Ortalyq basshysy Tolybai Dostybaevtyń aitýynsha, sońǵy jyldary bul nysanǵa erekshe nazar aýdarylyp keledi. Qalashyqtyń 53 gektar aýmaǵy tolyqtai qorshalyp, tarihi oryn bolashaqta ashyq aspan astyndaǵy mýzeige ainalady dep josparlanýda.
Qazba jumystaryna Atyraý ýniversitetiniń tarih mamandyǵynda oqityn stýdentter de qatysqan. Búginde 500 sharshy metr aýmaq arshylyp, tabylǵan artefaktiler oqý ordasynyń zerthanasynda saraptaýdan ótýde.
Tarihshylardyń pikirinshe, bul tabylǵan jádigerler Joshy Ulysy men Altyn Orda kezeńiniń ekonomikasy men saiasi qarym-qatynastaryna qatysty mańyzdy derekter berýi múmkin.
Foto: Gov.kz
