Tanymal akter Ábilmansur Serikovtiń burynǵy áieli Fariza Bekibai áleýmettik jelidegi paraqshasynda balalaryn qarjylai qamtamasyz etýge qatysty jazba jariialady, dep habarlaidy ult.kz.
Onyń aitýynsha, burynǵy kúieýinen alimentti turaqty túrde alý qiyn. Fariza Bekibai keide birneshe ai boiy tólem túspeitinin aityp, balalardyń kúndelikti qajettilikteri negizinen óz moinynda ekenin jetkizdi.
«Aliment alý – qiynnyń qiyny. Birde bar, birde joq. Mine, tórt aidan beri almadyq. Ózi aýdarmasa, biz de suramaimyz. Balalardyń emi, dári-dármegi, sabaqqa kietin kiimi – barlyǵy meniń moinymda», – dep jazdy ol.
Fariza Bekibaidyń sózinshe, balalary ákesinen tipti usaq-túiek qajettilikterine aqsha suraǵan kezde de kómek ala almaidy.
«Balam myń teńge surasa da, “joq” deidi. Namystanyp, menen surama dep urysamyn. Keide menen tyǵylyp suraidy. Telefonynan kórip qoiamyn. Ekeýi de ózimmen erip kelgen balalar sekildi», – dedi ol.
Ol balalardy qamtamasyz etý tek ananyń emes, ákeniń de mindeti ekenin atap ótti. Onyń pikirinshe, alimentpen qatar, balalardyń kiimine, tamaǵyna jáne em-domyna da ákesi tarapynan qarjylai qoldaý kórsetilýi kerek.
«Balalardy asyraý onyń da mindeti ǵoi. Myń teńge berip, bir qalam alyp bere almaityn ákeniń barynan joǵy dep oilaimyn. Basqa ýaqytta keremet kiinip júrgenshe, alimentin tólep, balalaryna kiim-keshek alyp, emine dári-dármek pen tamaǵyn áperse ǵoi», – dep jazdy Fariza Bekibai.
Sonymen qatar ol balalarynyń ákesimen birge ýaqyt ótkizýi de sirek ekenin aitty. Onyń sózinshe, úlken balasyn ákesi tek biyl jazda ǵana qydyrtýǵa alyp ketken.
«Balalardy bir ret te qydyrtqan emes. Úlkenin tek osy jazda ǵana alyp ketti. Qalǵan ýaqytta biz qol jaimaimyz. Kúnimiz soǵan qarap qalmasyn. Alla ádil», – dedi ol.
Ábilmansur Serikov kim?
Ábilmansur Serikov – qazaq teatr jáne kino ónerinde ózindik qoltańbasy qalyptasqan akter. Ol Qazaqstan Respýblikasy Úkimetiniń «Daryn» memlekettik jastar syilyǵynyń laýreaty.
Akter 1991 jyly 7 jeltoqsanda Almaty qalasynda dúniege kelgen. Ónerge jaqyn otbasynda ósken Ábilmansurdyń ákesi – belgili akter, ázilkesh, «Nysana» teatrynyń jetekshisi Ábýnasyr Serikov. Anasy – aktrisa Liza Serikova.
Ábilmansur Serikov kásibi bilimin T. Júrgenov atyndaǵy Qazaq ulttyq óner akademiiasynyń teatr fakýltetinde alǵan. Ol atalǵan oqý ornyn 2013 jyly támamdaǵan.
Oqýynan keiin akter Ǵ. Músirepov atyndaǵy Qazaq memlekettik akademiialyq balalar men jasóspirimder teatrynyń, sondai-aq Q. Qýanyshbaev atyndaǵy memlekettik akademiialyq qazaq mýzykalyq drama teatrynyń sahnasynda óner kórsetti.
Kino salasynda da birqatar este qalarlyq obrazdardy somdaǵan akterdiń filmografiiasynda «5:32», «Dos-Muqasan», «Balalyq shaǵymnyń aspany», «Igrok», «Jibek», «Tańdaý», «Almaty, ia liýbliý tebia!» syndy filmder men serialdar bar.
Ásirese «5:32» serialyndaǵy Shalqardyń jas kezin beineleýi kórermenniń akterge degen qyzyǵýshylyǵyn arttyrdy. Al «Dos-Muqasan» filminde qazaq mýzykasynyń tarihynda ózindik orny bar tanymal toptyń ómiri men shyǵarmashylyǵyn arqaý etken týyndyda oinady.
Ábilmansur Serikovtiń shyǵarmashylyq jolyndaǵy aitýly rólderiniń biri – «Balalyq shaǵymnyń aspany» filmindegi mektep jasyndaǵy Nursultan Nazarbaevtyń, iaǵni Sultannyń beinesi.
Akterdiń eńbegi memlekettik deńgeide de baǵalanyp, 2020 jyly jastarǵa arnalǵan «Daryn» memlekettik jastar syilyǵyna ie boldy.
