Aqtaýda eki jasar qyzǵa juqpaly aýrýlar aýrýhanasynda merzimi ótken preparat salynǵan, dep habarlaidy QazAqparat.
Qańtar aiynan beri dárigerler Rýfina esimdi búldirshinniń qyzýy ne sebepti 38 gradýsqa deiin kóterilip, aiaq-qoly tyrysyp qalatynyn anyqtai almaǵan. Búldirshin qyrkúiek aiynda aýrýhanaǵa úshinshi márte túsip, jeke zerthananyń arnaiy mamandaryn shaqyrǵan kezde ǵana tsitamegalovirýs diagnozy qoiylǵan. Bul aýrýǵa qarsy preparat tiisti nusqaýlardy qatań saqtaýdy talap etedi. Naýqas balanyń anasynyń aitýynsha, dárini ýaqytynda qoldanbasa, jaramsyz bolyp qalady.
«Bul preparat 24 saǵatqa jaramdy. Bala bir táýlik ishinde 2 ret qabyldaýy tiis. Saǵat 2-de ashyldy, iaǵni túngi saǵat 2-de berilý kerek, kelesi kúni qoldanbaý kerek. Olar úshinshi kúni preparatty qaita paidalandy. Al jaramdylyq merzimi ótip ketti», - dedi Aqtaý qalasynyń turǵyny Juldyz Tadjenova.
Onyń aitýynsha, jaramsyz preparatty salǵannan keiin qyzynyń jaǵdaiy kúrt nasharlaǵan. Kúnine balanyń dene temperatýrasy birneshe ret 39 gradýsqa deiin kóterilgen. Aýrýhana qyzmetkerleri oryn alǵan jaǵdaidy rastady. Qyzmetkerlerdiń biri óz kinásin moiyndady.
Oblystyq densaýlyq saqtaý basqarmasy meditsinalyq qyzmetkerden keshirim hatyn qabyldap, oǵan sógis jariialady.
«Ázirge tek sógis jariialaimyz. Óitkeni medbikeniń qyzmetinde mundai jaǵdai alǵash ret bolyp otyr. Qazir medbike óz kinásin moiyndap, balanyń ákesinen keshirim surady. Mundai tsitamegalovirýstyq infektsiia kezinde temperatýra bolýy qalypty», - dep túsindirdi Mańǵystaý balalar aýrýhanasy direktorynyń orynbasary Gúljan Ermekbaeva.
Alaida, zardap shekken qyzdyń anasy sógis túrindegi jazaǵa qanaǵattanbaidy. Ol meditsina qyzmetkerin jumystan shyǵaryp, balaǵa sapaly meditsinalyq kómek kórsetý úshin elordadaǵy Ana men bala ulttyq ortalyǵyna kvota alýdy kózdep otyr.
