Qutqarýshy Arystanbek Mashrap qaitys bolǵannan keiin III dárejeli «Aibyn» ordenimen marapattaldy, dep habarlaidy "Ult aqparat".
Memleket basshysy Qasym-Jomart Toqaevtyń Jarlyǵymen Pavlodar oblysy TJD Órt sóndirý jáne avariialyq-qutqarý jumystary qyzmetiniń № 12 órt sóndirý beketi bólimshesiniń komandiri Arystanbek Mashrap qaitys bolǵannan keiin III dárejeli «Aibyn» ordeni memlekettik nagradasymen marapattaldy.
Ordendi Tótenshe jaǵdailar ministri Iýrii Ilin órt sóndirýshiniń ákesi Qabzoldin Dýlat Mashrapulyna tapsyrdy.
Eske sala keteiik, qaiǵyly jaǵdai 2021 jyldyń 25 aqpanynda Pavlodar oblysynyń Aqsý qalasynda bolǵan. Arystanbek Mashrap turǵyn úide shyqqan órtti sóndirý kezinde jan tapsyrǵan.
Azamattyq qorǵaý serjanty Arystanbek Mashrap 2018 jyldan bastap azamattyq qorǵaý organdarynda qyzmet etti.
Tótenshe jaǵdailar ministri Iýrii Ilin Arystanbektiń mezgilsiz qaitys bolýyna bailanysty ákesine kóńil aitty.
Adamdardy qutqarý úshin óz ómirin qiǵan TJ qyzmetkerleriniń erligi sanamyzdan eshqashan óshpeidi. 1991-2021 jyldar aralyǵynda qyzmettik boryshyn atqarý kezinde azamattyq qorǵaý organdarynyń 53 qyzmetkeri qaza boldy.
