Aqsý qalalyq ákimdiginiń Alǵabas aýyldyq okrýgine qarasty Ainakól aýylynda úilerdegi krandarda sý toqtap qaldy, – dep habarlaidy pavlodarnews.kz.
Aýyl turǵyny, zeinetker Marjan Namazbaevanyń sózine qaraǵanda, problema eki apta buryn bastalǵan.
- Eki apta shamasynda sýdy qaita-qaita bir-eki saǵatqa ashyp-jaýyp otyrdy, - deidi aýyl turǵyny.
– Keshe sýdy múldem óshirip tastady. Endi sýsyz qaldyq. Úkimettiń biraz aqshasy jumsaldy ǵoi. Oǵan qosa, qubyrdy úige deiin qazyp tartyp alý úshin de aqsha jumsadyq. Qazirgi kezde sýdy mashinalarmen ákeledi. Biraq ol búkil aýyldy sýmen qamtamasyz ete almaidy ǵoi.
Marjan Namazbaevanyń aitýynsha, 2018 jyly ortalyqtandyrylǵan sý jelisi iske qosylǵan kezde halyq órkenietke jettik dep qýanǵan bolatyn. Basynda turǵyndar shynynda da úi kranynan aǵatyn sýdyń rahatyn kórgen. Biraq biylǵy jyldyń kókteminde jaǵdai nasharlady.
Alǵabas aýyldyq okrýgi ákiminiń mindetin atqarýshy Aslan Qasenovtiń aitýynsha, sýmen qamtý bir táýlikke sóndirildi. Maqsat – sýdyń jumsalý mólsherin anyqtaý.
- Keshe saǵat 14:30-da Lenin kentinen sýmen qamtý toqtatyldy, - deidi Aslan Qasenov. – Bul jerde sýdyń Ainakól aýylyn eseptemegendegi Lenin kentine jetkilikti mólsherin anyqtaý maqsaty kózdeldi. Bilýimshe, «Gorkomhoz» turǵyn úilerdiń jańǵyrtý» JShS sýdy búgin tústen keiin qosady. Aýyldyq okrýg basshylyǵynyń pikirinshe, Ainakóldi taza aýyz sýmen qamtýdaǵy basty másele – turǵyndardyń sýdy shamadan tys jáne maqsatsyz paidalanýynda.
- Sý óte kóp mólsherde jumsalýda, - deidi Aslan Qasenov. – Bul birneshe tazalaýdan ótken arteziandyq sý, iaǵni taza aýyz sý. Al turǵyndar ony baý-baqsha sýarýǵa paidalanady. Sol sebepti sý eki aýylǵa birdei jetpeidi.
2018 jyldyń sáýir aiynda «Ai-Sý Melioratsiia» JShS Aqsýǵa qarasty Ainakól men Syntas aýyldarynda sý jelilerin salýǵa kiristi. Sol jyldyń sońynda qurylys jumystary aiaqtaldy. Barlyǵy 216 úige sý jelileri tartyldy. Jelilerdiń jalpy uzyndyǵy - 17 shaqyrym shamasynda. Sý Lenin kentinen beriledi.
Aita keteiik, Pavlodardan 11 shaqyrym, Aqsýdan 21 shaqyrym qashyqtyqta ornalasqan Ainakólde shamamen 1000 adam turady.
