Foto: Gleb Garanich / Reuters
Ýkraina prezidenti Vladimir Zelenskii keńsesiniń burynǵy basshysy Andrei Ermakty sot 60 táýlikke qamaýǵa alý týraly sheshim shyǵaryp, oǵan 140 mln griven (shamamen 3,1 mln dollar) kóleminde kepilmen bosap shyǵý múmkindigin bergen bolatyn. Ermak mundai qarajaty joq ekenin, alaida dostary kómektesedi dep úmittenetinin aitty, dep habarlaidy Ult.kz.
«Buǵan deiin de aittym, mende mundai aqsha joq. <...> Men buǵan daiyndalǵan joqpyn. Tanystarym, dostarym jetkilikti dep oilaimyn, olar kómektese alady dep úmittenemin», – dedi Ermak sot sheshimi jariialanǵannan keiin jýrnalisterge.
Sondai-aq ol advokattarynyń apelliatsiialyq shaǵym túsiretinin málimdedi.
Foto: REUTERS / Alina Smutko/ Andrei Ermak sotta
Aita keteiik,dúisenbi kúni Ýkrainanyń Mamandandyrylǵan sybailas jemqorlyqqa qarsy prokýratýrasy Andrei Ermakqa Kiev mańyndaǵy elitaly turǵyn úi qurylysy kezinde aqshany jymqyrdy degen aiyp taǵylǵanyn habarlady. Kelesi kúni Joǵary antikorrýptsiialyq sot (VAKS) Ermakqa qatysty bultartpaý sharasyna kóshti.
SAP basshysy Aleksandr Klimenko vedomstvo Ermakty 4,1 mln dollar kóleminde kepil qoiý múmkindigimen qamaýǵa alýdy suraitynyn málimdegen bolatyn. Alaida sot kepil kólemin 3,1 mln dollarǵa túsirý týraly sheshim shyǵardy.
Beisenbi kúni sýdia óz sheshiminiń tek qarar bóligin ǵana oqydy. Sheshimniń qandai ýájderge negizdelgenin túsinýge múmkindik beretin tolyq mátin 18 mamyrda jariialanady dep kútilýde.
Andrei Ermak — ýkrainalyq zańger, kásipker jáne saiasatker. Ol 2020–2025 jyldary Prezident keńsesin basqardy. Keiin jemqorlyq shemalaryna qatysty tergeýge tústi.
