Dúisenbi, 13 sáýirde AQSh-tyń Joǵarǵy soty epidemiiaǵa bailanysty sýdialar alǵash ret telekonferentsiia rejiminde tyńdaý ótkizetinin habarlady. Sot tyńdaýynda prezident Tramptyń salyq deklaratsiiasyn jariialaýy týraly talapqa qatysty is qaralady.
AQSh prezidenti Donald Tramp buǵan deiin Joǵarǵy sotqa ótinish berip, óziniń býhgalterlik kompaniiasynan Niý-Iork prokýratýrasyna sońǵy segiz jyldaǵy salyq esebin berý týraly sot sheshimin toqtatýdy suraǵan.
Tramp bul másele boiynsha tómengi instantsiiadaǵy sottarda birneshe ret jeńilgen. 2019 jyly qarasha aiynda apelliatsiia soty burynǵy sheshimdi bekitip, Mazars býhgalterlik kompaniiasyn prezidenttiń salyq deklaratsiiasyn Manhetten prokýratýrasyna berýdi mindettegen.
Joǵarǵy sottyń resmi ókili Keti Erberg habarlaýynsha, mamyr aiynda sýdialar 10 is qaraidy. Sot otyrysynyń bári densaýlyq saqtaý organdarynyń usynysy boiynsha qashyqtan ótkiziledi dep habarlaidy «Amerika daýysy».
Joǵarǵy sottyń jańa tehnologiia júginetin kezi sirek. Mysaly, eki taraptyń argýmentteri áli kúnge deiin videoǵa jazylmaidy. Al naqty sot otyrysy kezindegi sóilegen sózder aýdiomen jazylmaidy. Joǵarǵy sot ókiliniń sózinshe bul joly radiotransliatsiia arqasynda jýrnalister sot otyrysyn tyńdai alady.
