دٷيسەنبٸ, 13 سەۋٸردە اقش-تىڭ جوعارعى سوتى ەپيدەميياعا بايلانىستى سۋديالار العاش رەت تەلەكونفەرەنتسييا رەجيمٸندە تىڭداۋ ٶتكٸزەتٸنٸن حابارلادى. سوت تىڭداۋىندا پرەزيدەنت ترامپتىڭ سالىق دەكلاراتسيياسىن جارييالاۋى تۋرالى تالاپقا قاتىستى ٸس قارالادى.
اقش پرەزيدەنتٸ دونالد ترامپ بۇعان دەيٸن جوعارعى سوتقا ٶتٸنٸش بەرٸپ, ٶزٸنٸڭ بۋحگالتەرلٸك كومپانيياسىنان نيۋ-يورك پروكۋراتۋراسىنا سوڭعى سەگٸز جىلداعى سالىق ەسەبٸن بەرۋ تۋرالى سوت شەشٸمٸن توقتاتۋدى سۇراعان.
ترامپ بۇل مەسەلە بويىنشا تٶمەنگٸ ينستانتسيياداعى سوتتاردا بٸرنەشە رەت جەڭٸلگەن. 2019 جىلى قاراشا ايىندا اپەللياتسييا سوتى بۇرىنعى شەشٸمدٸ بەكٸتٸپ, Mazars بۋحگالتەرلٸك كومپانيياسىن پرەزيدەنتتٸڭ سالىق دەكلاراتسيياسىن مانحەتتەن پروكۋراتۋراسىنا بەرۋدٸ مٸندەتتەگەن.
جوعارعى سوتتىڭ رەسمي ٶكٸلٸ كەتي ەربەرگ حابارلاۋىنشا, مامىر ايىندا سۋديالار 10 ٸس قارايدى. سوت وتىرىسىنىڭ بەرٸ دەنساۋلىق ساقتاۋ ورگاندارىنىڭ ۇسىنىسى بويىنشا قاشىقتان ٶتكٸزٸلەدٸ دەپ حابارلايدى «امەريكا داۋىسى».
جوعارعى سوتتىڭ جاڭا تەحنولوگييا جٷگٸنەتٸن كەزٸ سيرەك. مىسالى, ەكٸ تاراپتىڭ ارگۋمەنتتەرٸ ەلٸ كٷنگە دەيٸن ۆيدەوعا جازىلمايدى. ال ناقتى سوت وتىرىسى كەزٸندەگٸ سٶيلەگەن سٶزدەر اۋديومەن جازىلمايدى. جوعارعى سوت ٶكٸلٸنٸڭ سٶزٸنشە بۇل جولى راديوترانسلياتسييا ارقاسىندا جۋرناليستەر سوت وتىرىسىن تىڭداي الادى.
