Jeksenbi kúni AQSh Ulttyq allergiialyq jáne juqpaly aýrýlar institýtynyń direktory Entoni Faýchi jańa koronavirýstan 100 myńnan 200 myń adamǵa deiin qurban bolýy múmkin ekenin málim etti.
Virýstan 2000-nan astam amerikalyq qaitys bolǵan, dep habarlaidy "Ult aqparat" CNN-ge silteme jasap.
Sondai-aq, ol milliondaǵan adamnyń koronavirýs juqtyrýy múmkin ekenin atap ótti.
Eki kúnniń ishinde qaitys bolǵandar sany eki esege artyp, 2 myń adamǵa jetken. Senbi kúni tańerteńgi jaǵdai boiynsha, AQSh-ta 121 myń adam aýrý juqtyrǵan.
Jeksenbi kúni prezident Donald Tramp baspasóz máslihatynda málim etkendei, AQSh-ta koronavirýstan qaitys bolǵandar sany 100 myń-200 myń adamǵa jetse, ákimshilik «jaqsy jumys istedi» dep aitýǵa bolady.
Aýrý juqtyrǵandar sanynyń kún sanap artyp jatqanyna bailanysty aýrýhanalarda oryn tapshy, ásirese Niý-Iorkte – shtatta elde aýrý juqtyrǵandar eń kóp tirkelgen.
Eldegi kóptegen aýrýhanalarda eki aptadan keiin oryn bolmaidy, sebebi aýrý juqtyrǵandar sany ósip jatyr, dep málimdedi Tramp.
Virýstyń taralýyn toqtatý masatynda túrli qalalar men shtattarda, sonyń ishinde Niý-Iorkte bilik turǵyndardyń úide qalýyn mindetteitin sheshim shyǵarǵan. Bul sheshim 215 mln amerikalyqqa qatysty bolyp otyr.
Johns Hopkins University málimetinshe, AQSh-ta jeksenbi kúngi derek boiynsha aýrý juqtyrǵandar sany 142 myń adamǵa jetti. COVID-19 shaldyqqandar sany álemde 722 myń adam, odan 34 myń adam kóz jumdy.
