Djordj Floidtyń ólimine kináli degen aiyp taǵylǵan burynǵy politsiia qyzmetkeri Derek Shovin sot tyńdaýynda otyr. Minnesota, AQSh, 25 maýsym 2021 jyl. Videodan skrinshot.
AQSh-tyń Minnesota shtatynyń soty burynǵy politsiia qyzmetkeri 45 jastaǵy Derek Shovindi 22 jarym jylǵa túrmege qamaýǵa úkim shyǵardy. Sot Shovindi politsiia kúdikti retinde ustaǵannan keiin kóz jumǵan afroamerikalyq Djordj Floidtyń ólimine aiypty dep tanydy.
Floidtyń qazasy byltyr AQSh-ta jappai narazylyq týǵyzyp, násilshildik máselesiniń qaita qozǵalýyna túrtki boldy. Júzdegen qalada "Qara násildilerdiń ómiri mańyzdy" degen uranmen násilshildikke qarsy narazylyq aktsiialary ótken. Bul oqiǵalar eldegi qoǵamdyq-saiasi protsesterge áser etti.
Juma kúni sýdia Piter Kehill 22 betten turatyn úkimdi jariialap, ony emotsiiaǵa nemese eń qatań jaza talap etken qoǵamdyq pikirge emes, zańǵa súienip shyǵarǵanyn málimdedi. Ol buǵan qosa Floid otbasy músheleriniń "qaiǵysyn sezinetinin" aitty.
Bul - AQSh tarihynda qyzmet babynda adam óltirip alǵan burynǵy politsiia qyzmetkerlerine shyǵarylǵan eń qatań úkim bolyp otyr. Úkimde Shovinniń aiybyn aýyrlatqan qyzmet ókiletin teris paidalaný jáne adamnyń qadir-qasietin taptaý tárizdi jaittar eskerilgen.
Prokýratýra sarapshy retinde shaqyrtqan dárigerler Djordj Floid dem jetpei, tunshyǵyp ólgen degen qorytyndy shyǵarǵan.
Aiyptaýshy tarap sottan Derek Shovindi 30 jylǵa bostandyǵynan aiyrýdy suraǵan edi. Shovin úkim shyǵar aldynda Floidtyń týystaryna kóńil aitqan, biraq ol ózine taǵylǵan aiyppen kelispegen. Onyń advokattary Floidtyń ajalyna politsiianyń is-qimyly sebep bolǵanyna dálel joq degen ýáj aitqan.
Byltyr 25 mamyrda dúkende jalǵan kýpiýra ótkizgen degen kúdikke ilingen 46 jastaǵy Djordj Floidty politsiia ustaǵan. Politsiia ofitseri Derek Shovinniń jerde jatqan Floidty moinynan tizesimen basyp, toǵyz minýttan astam ýaqyt boiy tapjyltpai ustaǵany jaily video jurtqa taraǵan. Onda Floidtyń dem jetpei jatqanyn aityp aiqailaǵany, anasyn shaqyrǵany estiledi. Sol kúni keshke politsiia Floidty Minneapolistegi aýrýhanaǵa jetkizip, ol sonda qaitys boldy.
Biyl sáýirde 12 adamnan quralǵan sot alqasy "abaisyzda kisi óltirý", "adam óltirý" jáne "tunshyqtyrý" baptary boiynsha aiyp taǵylǵan Derek Shovindi kináli dep tapqan.
