AQSh biligi kúz ailarynda Qytai elshiliginiń eki qyzmetkerin Pekinge qaitarǵan, - dep jazady qupiia derekkózine súiengen The New York Times basylymy. Buǵan deiin bul aqparatty ne Vashington, ne Pekin aitpaǵan.
Basylymnyń jazýynsha, qytai diplomattary Virdjiniia shtatyndaǵy áskeri baza aýmaǵynda ustalǵan. Áskeri nysanǵa arnaiy ruqsatsyz kirýge tyiym salynǵan. AQSh biligi "tyńshylyq jasady" dep kúdikke ilingen diplomattardy Pekinge qaitarýdy uiǵarǵan. 1987 jyldan beri osy tárizdi oqiǵa bolmaǵan.
The New York Times basylymynyń jazýynsha, AQSh-tyń arnaiy qyzmet ókilderi Pekinge qaitarylǵan eki ofitserdiń keminde bireýin Qytaidyń barlaý qyzmetiniń ókili dep sanaidy. Diplomattar ózderiniń izine túsken Amerikanyń áskerilerinen jasyrynýǵa tyrysqan jáne kóliginiń jolyn japqannan keiin ǵana baryp toqtaǵan.
Qazan aiynda AQSh qytai diplomattaryna shekteý qoiyp, jergilikti bilik ókilderimen kezdesýdi josparlasa nemese bilim berý, zertteý uiymdaryna barǵysy kelse, aldyn ala habarlaýdy mindettegen. Ol kezde AQSh memlekettik departamenti "bul osyǵan uqsas Qytaidyń qoiǵan shekteýine jaýap" dep túsindirgen. Al basylym shekteýdi áskeri bazada bolǵan oqiǵamen bailanystyrady. Qupiia derekkózge súiengen The New York Times jazýynsha, Qytai jaǵy ázirge shekteý qoimaǵan.
