اقش بيلٸگٸ كٷز ايلارىندا قىتاي ەلشٸلٸگٸنٸڭ ەكٸ قىزمەتكەرٸن پەكينگە قايتارعان, - دەپ جازادى قۇپييا دەرەككٶزٸنە سٷيەنگەن The New York Times باسىلىمى. بۇعان دەيٸن بۇل اقپاراتتى نە ۆاشينگتون, نە پەكين ايتپاعان.
باسىلىمنىڭ جازۋىنشا, قىتاي ديپلوماتتارى ۆيردجينييا شتاتىنداعى ەسكەري بازا اۋماعىندا ۇستالعان. ەسكەري نىسانعا ارنايى رۇقساتسىز كٸرۋگە تىيىم سالىنعان. اقش بيلٸگٸ "تىڭشىلىق جاسادى" دەپ كٷدٸككە ٸلٸنگەن ديپلوماتتاردى پەكينگە قايتارۋدى ۇيعارعان. 1987 جىلدان بەرٸ وسى تەرٸزدٸ وقيعا بولماعان.
The New York Times باسىلىمىنىڭ جازۋىنشا, اقش-تىڭ ارنايى قىزمەت ٶكٸلدەرٸ پەكينگە قايتارىلعان ەكٸ وفيتسەردٸڭ كەمٸندە بٸرەۋٸن قىتايدىڭ بارلاۋ قىزمەتٸنٸڭ ٶكٸلٸ دەپ سانايدى. ديپلوماتتار ٶزدەرٸنٸڭ ٸزٸنە تٷسكەن امەريكانىڭ ەسكەريلەرٸنەن جاسىرىنۋعا تىرىسقان جەنە كٶلٸگٸنٸڭ جولىن جاپقاننان كەيٸن عانا بارىپ توقتاعان.
قازان ايىندا اقش قىتاي ديپلوماتتارىنا شەكتەۋ قويىپ, جەرگٸلٸكتٸ بيلٸك ٶكٸلدەرٸمەن كەزدەسۋدٸ جوسپارلاسا نەمەسە بٸلٸم بەرۋ, زەرتتەۋ ۇيىمدارىنا بارعىسى كەلسە, الدىن الا حابارلاۋدى مٸندەتتەگەن. ول كەزدە اقش مەملەكەتتٸك دەپارتامەنتٸ "بۇل وسىعان ۇقساس قىتايدىڭ قويعان شەكتەۋٸنە جاۋاپ" دەپ تٷسٸندٸرگەن. ال باسىلىم شەكتەۋدٸ ەسكەري بازادا بولعان وقيعامەن بايلانىستىرادى. قۇپييا دەرەككٶزگە سٷيەنگەن The New York Times جازۋىنشا, قىتاي جاعى ەزٸرگە شەكتەۋ قويماعان.
