Siriiadaǵy Resei áskerileri halyqaralyq koalitsiia kúshterimen qaqtyǵysty boldyrmaý týraly hattama erejesin buzdy, dep málimdedi 20 aqpanda "Islam memleketi" terroristik tobymen kúres boiynsha halyqaralyq koalitsiianyń ókili Maikl Keggins. Koalitsiiada AQSh jetekshi ról atqarady.
Beisenbi kúni Siriia shyǵysyndaǵy Kamyshly qalasynda reseilik "Tigr-M" brondy kóligi amerikalyq M-ATV Oshkosh tehnikasyn qýyp jetpek bolyp, joldan ótip bara jatqan qarapaiym Siriia azamatyn qaǵyp kete jazdaǵan. Oqiǵa ornynan túsirilgen video internette tarap ketti.
"Reseilik saqshy qaqtyǵysty boldyrmaý týraly erejege baǵynǵan joq, olar amerikalyq áskeriler operatsiia júrgizip jatqan aýmaqtan shyǵaryldy" dedi Keggins Jerusalem Post basylymyna. Onyń aitýynsha, reseilik áskeriler únemi ereje buzady, degenmen taraptar arasynda bailanys kásibi dárejede ótedi.
AQSh bastaǵan halyqaralyq koalitsiia 2014 jyly Siriiadaǵy radikaldy toptarmen kúres bastaǵan. Koalitsiia Siriianyń demokratiialyq oppozitsiia kúshterin qoldaidy. Resei Siriiada áskeri operatsiiasyn 2015 jyly kúzde bastaǵan. Ol prezident Bashar Asad áskerin qoldap, birneshe jyldan beri jalǵasyp kele jatqan azamattyq soǵysta Asadtyń basymdyqqa ie bolýyna yqpal etken. Batys Máskeýdi adam quqyǵyn óreskel buzdy dep aiyptaǵan.
