AQSh memlekettik hatshysy Entoni Blinken jáne NATO bas hatshysy Iens Stoltenberg dúisenbi kúni Ýkrainamen shekara mańynda Resei áskeriniń shoǵyrlanýy máselesin talqylady.
AQSh memlekettik departamentiniń baspasóz hatshysy Ned Praistyń habarlaýynsha, Blinken men Stoltenberg Reseidiń Ýkrainamen shekara mańynda jáne anneksiialanǵan Qyrymda áskeri daiyndyqqa sýyt kóshýin toqtatý qajettigin atap ótken.
Buǵan qosa, Blinken men Stoltenberg Aýǵanstanda beibit protsesti damytý men NATO-nyń aldaǵy sammitimen bailanysty máselelerdi talqylaǵan. "Amerika daýysy" saity kezdesýdiń AQSh memlekettik hatshysynyń Briýsselge sapary qarsańynda bolyp otyrǵanyna nazar aýdarady.
Dúisenbi kúni "Úlken jetilik" (G7) elderiniń syrtqy ister ministrleri men Eýroodaqtyń syrtqy saiasat jónindegi vedomstvosy Reseidi Ýkraina shekarasyna jaqyn mańdaǵy "arandatý áreketin" toqtatýǵa shaqyrdy.
- Ýkraina prezidenti Vladimir Zelenskiidiń baspasóz hatshysy Iýliia Mendel dúisenbi kúni Reseidiń Ýkrainamen shekara mańyna 80 myń sarbaz ákelgenin, 40 myńyn Qyrymǵa shoǵyrlandyrǵanyn habarlady.
- Mendeldiń aitýynsha, Zelenskii Resei prezidenti Vladimir Pýtinge kelissóz ótkizý jaily usynys jibergenmen ázirge deiin jaýap almaǵan. Kreml muny joqqa shyǵarady.
- Resei taraby áskerdi basqa aýmaqqa kóshirgenin joqqa shyǵarmaidy, biraq onyń eshqandai qaýpi joǵyn alǵa tartady. Biraq Máskeý Ýkraina Donbasta separatisterge shabýyldai bastasa, Resei jaǵdaiǵa aralasýy múmkin ekenin eskertken.
