Tarazda Turan Álem Bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi jalǵasýda. AQSh-tan kelgen kriminalist mamandar Erjan Tátishevtiń ólimine bailanysty óz saraptamasyn jasady. Búgin sot otyrysynda táýelsiz sarapshy zertteý qorytyndysymen tanystyrdy, dep habarlaidy Baq.kz tilshisi.
Erjan Tátishevtiń óliminen keiin tórt márte saraptama jasalǵany málim. Biraq, bir qorytyndyda germaniialyq myltyq ózdiginen atylýy múmkin emes dese, endi bireýler olai bolýy múmkin degen uiǵarymǵa kelgen. Marqum bankirdiń otbasy bul máselege núkte qoiý úshin saraptama salasynda 20 jyldan astam tájiribesi bar amerikalyq Maikl Patrik Merfi, Skott Maikl Perkins pen Iris Delli esimdi mamandarǵa júgingen. Olar búgin Tarazdaǵy sotqa qatysyp otyr. Otyrysqa sondai-aq Tátishevter otbasynyń advokaty Evgenii Iavorskii qatysýda.
Maikl Patrik Merfi qylmysty zertteý, onyń ishinde adam ólimin tergeý salasynda 25 jyl jumys isteitinin aitty.
«Maǵan osy ólimdi zertteý usynysy tústi. Sol sebepten sot-saraptamalyq top qurdym. Men osy toptyń jetekshisimin. Topta meditsinalyq, kriminaldyq, qan tańbalaryn zertteitin sarapshylar jumys istedi. Biz qazaqstandyq politsiia qyzmetimen jumys istep, qajetti aqparat jinadyq. Qylmys bolǵan jerge de bardyq. Barlyq sarapshylar óz zertteýin júrgizip, qorytyndysyn jasady. Meniń negizgi jumysym - oqiǵanyń sebebin anyqtaý. Osy oqiǵa jaily aitsam, adam (Erjan Tátishev - avt.) art jaqtan atylǵan. Qarý oǵan ádeii baǵyttalǵan. Al janynda otyrǵan adam ony óltire almaidy. Júrgizýshi alǵa qarap kele jatqanda óltirilgen. Buǵan oqtyń ushý baǵyty men marqumnyń alǵan jaraqattary dálel. Qarý óte qymbat bolǵan. Bundai qarý eshqashan ózi atylmaidy. Biz osy qarýdy tazalaityn adammen sóileskende, ol qarýdyń jaǵdaiy jaqsy bolǵanyn aitty. Osy oqiǵadan keiin qarý politsiiada da tekserilgen. Olar da qarý ózdiginen atpaidy degen. Qarýdyń serippesin baspasa, ol ózdiginen atylmaidy. Qarý keiinnen bireýmen ózgertilgen», - dedi Maikl Patrik Merfi.
Jýyrda sot protsesinde Tátishev abaisyzda óltirildi dep taný úshin qarýǵa mehanikalyq ózgeris jasalǵany belgili boldy. Osylaisha, qarý ózdiginen atyldy degen qorytyndy shyqqan. Ózgeris jasaǵan kýágerden de jaýap alynǵan edi.
Maikl Patrik Merfidiń aitýynsha, Erjan Tátishev qasaqana óltirilgen. Sebebi, qarý oǵan ádeii baǵyttalyp, ol óltirgen adamnyń qolynda qalǵan. Al, abaisyzda jasalǵan qylmys bolsa, qarý qoldan qulap, basqasha jatýshy edi.
Atap ótsek, keshe sot otyrysynda taraptar oqiǵa ornynda túsirilgen videomen tanysty. Videoda Toqmádi Tátishevti qalai óltirgenin kórsetti.
Eske salsaq, Tarazda Turan Álem Bankiniń burynǵy tóraǵasy Erjan Tátishevti óltirdi dep aiyptalyp otyrǵan biznesmen Murathan Toqmádi isine qatysty sot protsesi ótip jatyr. Osylaisha, 14 jyl burynǵy qylmys qaita tekserilýde. Al, 11 jyl buryn biznesmen Toqmádi dál osy qylmysy úshin jazadan sytylyp ketken bolatyn. Sol kezde qylmys abaisyzda jasaldy delinip, Murathan Toqmádi Taraz qalalyq sotynyń 2007 jylǵy 3 qyrkúiektegi úkimimen bir jylǵa bas bostandyǵynan aiyrylyp, raqymshylyqpen jazadan bosatyldy. Bul is boiynsha tergeý amaldary men sottar 3 jylǵa sozylǵan edi.
2017 jylǵy 12 maýsymda Almatydaǵy arnaiy operatsiia barysynda «QazStroiSteklo» JShS bas direktorynyń keńesshisi Murathan Toqmádi ustaldy. Biznesmen «Iri kólemdegi múlikke ie bolý maqsatynda bopsalaý» baby boiynsha qylmys jasady degen kúdikpen quryqtalyp, úsh jylǵa bas bostandyǵynan aiyryldy. 2017 jylǵy qazanda KTK arnasynan kórsetilgen filmde Toqmádi Erjan Tátishevti óltirgenin moiyndap, bankirdiń kózin Muhtar Áblázovtyń tapsyrysymen joiǵanyn aitty. Sondai-aq, Áblázovten Tátishevti óltirý úshin 2 transhpen 4 mln dollar kóleminde syiaqy alǵanyn da jasyrmady. Osylaisha, Muhtar Áblázov Erjan Tátishevtiń óliminen keiin Turan Álem Bankiniń basshylyǵyna kelgen. 2018 jylǵy 16-aqpanda Jambyl oblystyq sotynda Toqmádiden jaýap alynyp, ol osy aitqandaryn rastady.
