AQSh biligi Irannyń segiz sheneýnigine jáne eldiń metal óndirisine jańa sanktsiialar saldy. 10 qańtarda Vashingtonda AQSh memlekettik hatshysy Maik Pompeo men qarjy ministri Stiven Mnýchin baspasóz máslihatyn ótkizip, sanktsiia salynǵanyn jariialady.
AQSh-tyń jańa sanktsiiasyna ilingender arasynda Iran ulttyq qaýipsizdik keńesiniń hatshysy Ali Shamhani, Iran karýly kúshteri qolbasshysynyń orynbasary Reza Ashtiani, Islam revoliýtsiiasy korpýsynyń «Basidj» jasaǵynyń basshysy Golemreza Súleimani bar.
Buǵan qosa, Vashington Qytai men Seishel araldarynda ornalasqan 17 taý-ken jáne metall kompaniiasyna, metall saýdasymen ainalysqan kemege de sanktsiia saldy.
Budan bólek, AQSh prezidenti Donald Tramp arnaiy jarlyqqa qol qoiyp, Iran rejiminiń qosymsha tabys kózderine shekteý qoidy.
AQSh Iranǵa jańa sanktsiiany Tegeran men Vashington arasyndaǵy jaǵdai ushyqqan sátte jáne Tegeranda ýkrainalyq jolaýshylar ushaǵy apatqa ushyraǵan kezde saldy. 3 qańtarda AQSh Baǵdadta áýe shabýylyn jasap, Irannyń «Quds kúshteriniń» qolbasshysy Kasem Súleimanidi óltirgen. Keiin Iran AQSh-tyń Iraktaǵy áskeri bazasyna shabýyl jasaǵan. Shabýyldan soń Tramp Tegeranǵa jańa sanktsiia salatynyn málimdegen.
