AQSh koronavirýsqa qarsy amerikalyq vaktsinany "qaralaýdy kózdeitin" reseilik kampaniiany synady. Vashington "qolda bar quraldarmen" atalǵan kampaniiaǵa toitarys berýge ýáde berdi.
"Kún saiyn adamdar ómirin qutqaryp jatqan vaktsina týraly jalǵan aqparat taratqan Reseidiń eski aila-amaldarǵa júginip jatqany beseneden belgili jáne sol arqyly adamdardyń ómirine qaýip tóndirip jatyr" dedi AQSh memlekettik departamentiniń resmi ókili Ned Prais 8 naýryzda jýrnalisterge.
Bir kún buryn amerikalyq Wall Street Journal basylymy memlekettik departamentke qaraityn Ǵalamdyq ózara qimyl ortalyǵynyń qorytyndysyn jariialaǵan. Onda "qaralaý" kampaniiasyna qatysqan tórt onlain-platformanyń artynda Resei barlaý qyzmeti turǵany jazylǵan. WSJ jazýynsha, saittar amerikalyq Pfizer vaktsinasynyń qaýpi jaily maqalalar jariialap, reseilik "Spýtnik V" vaktsinasynyń óndirisine serpin berýge tyrysqan. Atalǵan platformalar amerikalyq vaktsina jaily teris pikir bildirgen halyqaralyq jańalyqtardy jii jariialap, preparattyń qaýipsizdigi men tiimsizdigi jaily aqparat bermegen.
Ned Praistyń sózine qaraǵanda, saittarda AQSh azyq-túlik jáne dári-dármek sapasyn sanitarlyq baqylaý jónindegi basqarma maquldaǵan eki vaktsina týraly jalǵan aqparat bar.
Aq úi baspasóz hatshysy Djen Psaki brifing kezinde AQSh "qolda bar quraldarmen qaralaý kampaniiasyna toitarys beredi" dep málimdedi.
