1 aqpannan beri 5 adam koronavirýsqa qarsy vaktsinadan bas tartty. Bul týraly Ortalyq kommýnikatsiialar qyzmetinde Nur-Sultan qalasynyń qoǵamdyq densaýlyq saqtaý basqarmasynyń basshysy Timýr Muratov málim etti, dep habarlaidy "Ult aqparat".
«Aqpan aiynda 2030 doza vaktsina salynady dep josparlap otyrmyz. Qazirgi ýaqatta 719 adam vaktsinasyn (1-8 aqpan aralyǵynda) alyp úlgerdi. Qalǵany osy aidyń ishinde ekpe saldyrady. Soǵan qosa, bul vaktsinanyń ekinshi komponentin de osy aidyń sońynan bastap jasaityn bolamyz», - dedi T. Muratov Ortalyq kommýnikatsiialar qyzmetinde.
Sonymen qatar ol vaktsina alǵan adamdardyń arasynda aitarlyqtai keri reaktsiia bolmaǵanyn jetkizdi.
«Vaktsina salǵan orynnyń aýyrýy jáne keshke taman adamnyń sál álsireýin keri reaktsiia dep aitýǵa bolmaidy. Vaktsina alǵan adam úshin ol qalypty jaǵdai. Men ózim vaktsina aldym, birinshi kúnniń keshinde sondai kóńil-kúide boldym. Ekinshi kúni bul kúi ózdiginen ketip qaldy», dep túsindirdi basqarma basshysy.
T. Muratov vaktsinadan óz erkimen bas tartqan meditsina qyzmetkerleri týraly aitty.
«Vaktsina saldyrýdan bas tartqan azamattar bar dep aityp otyrmyz. Olardyń ishinde meditsina qyzmetkerlerine ekpe saldyryp jatyrmyz. Ózderińiz kórip otyrǵandai, jospar boiynsha myńnan asa adamǵa jasaý kerek edi (1-8 aqpan aralyǵynda vaktsiianalaýǵa 916 adam), sonyń ishinde 719-yna jasap úlgerdik. Óz erkimen bas tartqandar 5 adam ǵana. Olar óziniń oiymen, túsinigimen ázirshe vaktsina almaimyz dep sheshti. Qalǵan vaktsina saldyrmaǵan adamdarǵa toqtalsaq, olarǵa meditsinalyq qarsy kórsetilimi boiynsha qoiylmady», - dedi ol.
Budan buryn habarlanǵandai, elordanyń Qoǵamdyq densaýlyq saqtaý basqarmasynyń qoimasynda KVI-ǵa qarsy vaktsinanyń 1 531 dozasy bar.
