Sýret: Aqorda
Memleket basshysy sý tasqynymen kúres sharalaryna belsene atsalysqan el azamattaryn marapattaý rásiminde sóz sóiledi, dep habarlaidy "Ult aqparat" Aqordanyń baspasóz qyzmetine silteme jasap.
Prezident, eń aldymen, bul buryn eshqashan bolmaǵan eń joiqyn tabiǵi apat ekenin atap ótti. Qazaqstannyń 10 aimaǵynda tótenshe jaǵdai jariialandy. Jalpy, el kóleminde 19 myńnan astam turǵyn úidi sý basty.
"Syn saǵatta elimiz yrysty yntymaǵyn tanytty. Biz tabiǵi apat kezinde jurt bolyp jumyldyq. Birtutas el ekenimizdi kórsettik. Qutqarýshylar, áskeriler, ishki ister organdary men ákimdik qyzmetkerleri táýlik boiy jumys istedi. Olar Otan aldyndaǵy paryzyn minsiz atqardy. Bir sózben, antqa adal boldy", - dedi Memleket basshysy.
Sýret: Aqorda
Qasym-Jomart Toqaev topan sýmen kúreske kúshtik qurylymdardyń 63 myńnan astam qyzmetkeri atsalysqanyna nazar aýdardy. Qutqarý operatsiiasy barysynda 120 myńnan astam adam, onyń ishinde 40 myń bala qaýipsiz jerge kóshirildi.
"Bul – qutqarýshylar men ushqyshtardyń qajyrly eńbeginiń nátijesi. Ábish Kekilbaev «Elin súigen azamatqa eń úlken qaiǵy – óz halqynyń taǵdyrynan tys qalý» dep aitqan. Ulttyq eriktiler jelisi tabiǵi apat bolǵan sátten bastap erekshe belsendi boldy. 50 myńnan astam volonter kómek kerýenderin uiymdastyrdy. Olar apat aimaqtaryna azyq-túlik jáne basqa da qajetti zattardy jetkizýge atsalysty. Qazaqstan halqy Assambleiasynyń «Júrekten júrekke» aktsiiasy ortaq iske mol septigin tigizdi", – dedi Prezident.
Memleket basshysy Kentaý qalasynda turatyn Gaýhar Shaimerden esimdi oqýshy qyzdyń ata-anasyna otanshyl urpaq ósirip jatqany úshin alǵys aitty. Ol ózi jinap júrgen qarjysyn Qulsary qalasynyń turǵyndaryna aýdarǵan. Sonymen qatar Atyraý oblysynyń turǵyndary – toqsannan asqan Orynsha Toqtybaqqyzy men Áliia Dosmuhanovanyń eren eńbegin erekshe atap ótti. Budan bólek, Prezident kómek bergeni úshin baýyrlas memleketterge, halyqaralyq kompaniialar men uiymdarǵa rizashylyǵyn bildirdi.
"Naǵyz dostyq qiyndyqta synalady dep tekten-tek aitpaidy. Keibir sheteldik azamattar zardap shekken adamdarǵa járdemdesý úshin arnaiy keldi. Osy sátti paidalanyp, qiyn-qystaý shaqta qoldaý bildirgeni úshin sheteldik seriktesterimizge jáne dostarymyzǵa shyn júrekten rizashylyǵymdy bildiremin", – dedi Memleket basshysy.
Prezidenttiń aitýynsha, sý tasqyny kezinde halqymyz birligi bekem, yntymaǵy berik el ekenin kórsetti.
"Alapat sý tasqyndap kelip qalǵanda, otandastarymyz tabiǵat apatymen kúresip jatqan qutqarýshylarǵa kómek qolyn sozdy. Olar sý basqan aimaqtarda jaýapty qyzmet mekemelerine járdemdesip, janqiiarlyqpen áreket etti ári batyldyq tanytty. Kóbi adamdar men janýarlardy óz kólikterimen qaýipsiz jerge alyp shyqty. Myńdaǵan janashyr azamat tasqyn sýdan qorǵaityn bógen salýǵa qatysty. Ortaq kúsh-jigerdiń arqasynda biz jaǵdaidyń ýshyǵyp ketýine jol bermedik", – dedi Qasym-Jomart Toqaev.
Sonymen qatar Memleket basshysy ózderin naǵyz otanshyl ári jaýapty azamat retinde kórsetken eriktilerdiń eńbegin joǵary baǵalap, olardy qazirgi zamannyń batyrlary dep atady.
"Men eriktiler qozǵalysynyń damýyna airyqsha mán beremin. Ózderińizge málim, 2020 jyldy Volonter jyly dep jariialadym. Osy ýaqyt ishinde elimizdegi volonterlik qyzmet múlde jańa deńgeige kóterildi. Eriktilerdiń kúsh-jigeriniń arqasynda mańyzdy bastamalar men jobalar júzege asty. Eń bastysy, biz adamdardyń memleket pen qoǵam ómirine aralasýǵa, adami qundylyqtar men qasietterge sai bolýǵa degen nietin oiattyq. Elimizdegi jan-jaqty jańǵyrýlardyń qozǵaýshy kúshi – adam. Qolǵa alynǵan aýqymdy reformalar tabysty júzege asý úshin elimizdiń barsha azamaty kúsh biriktirýi qajet ekenine senimdimin", – dedi Qasym-Jomart Toqaev.
Prezident baspanasyz qalǵan adamdarǵa «Qazaqstan halqyna» qorynan turǵyn úi salýǵa qarajat bólingenin aitty. Jalpy, 2200-den astam úi salynady. Sondai-aq 10 myńǵa jýyq baspana kúrdeli jóndeýden ótedi.
"Tasqynnyń zardabyn joiýǵa birqatar kásipkerimiz qomaqty qarajat bóldi. Olar árdaiym týǵan elimen birge ekenin naqty ispen dáleldedi. Ult múddesine sai jaýapkershiligi mol kásipkerlik degenimiz – osy. Árine, qalys qalǵan kásipkerler de az emes, olardyń kim ekenin de jaqsy bilemiz. Biz eshkimdi májbúrlegen joqpyz. Árkim óz tańdaýyn jasady", – dedi Memleket basshysy.
Qasym-Jomart Toqaev Kievte Qazaqstan jýrnalisine jasalǵan qastandyq áreketke qatysty pikir bildirdi.
"Elimizde Zań ústemdigin nyǵaityp jatyrmyz, iaǵni barlyq salada, eń aldymen, Zań ústemdigin qamtamasyz etý – basty mindet. Bul másele boiynsha meniń kózqarasym – aiqyn. Muny ózderińiz de jaqsy bilesizder. Qazaqstanda Zań men tártip bárinen biik turýǵa tiis. Sondyqtan qoǵamdaǵy barlyq qarama-qaishylyqtar men kelispeýshilikterdi tek qana quqyqtyq turǵydan, iaǵni tiisti Zańnamaǵa jáne negizgi halyqaralyq normalarǵa sáikes sheshý qajet. Keshe Qazaqstan azamaty Aidos Sadyqovqa qatysty Kievte bolǵan qylmysqa da dál osy ustanym turǵysynan qaraǵan jón. Men diplomatiialyq arnalar men quqyq qorǵaý organdary arqyly osy oqys oqiǵa boiynsha resmi suratýlar jiberý týraly naqty tapsyrma berdim. Sondai-aq qajet bolǵan jaǵdaida Qazaqstannyń resmi organdary istiń aqiqatyna jetýge járdem berý úshin tergeý jumysyna qatysýǵa daiyn ekenin aitqym keledi", – dedi Prezident.
Qasym-Jomart Toqaev sózin qorytyndylai kele, apat saldaryn joiýǵa atsalysqan ár azamatqa shynaiy rizashylyǵyn bildirdi.
"Barshańyzǵa málim, qazir «Taza Qazaqstan» aktsiiasy bastaldy. Bul – óte mańyzdy áleýmettik, tipti saiasi joba. Onyń túpki máni – ultty ortaq iske uiystyryp, elimizdi kórkeite túsý, halqymyzdyń jańa ekologiialyq sana-sezimin damytý. Buǵan, eń aldymen, ózderińiz siiaqty adal azamattar uiytqy bolady. El múddesi úshin jasalǵan eńbek pen erlik eshqashan umytylmaidy. Sondyqtan búgingi marapatty halyqtyń sizderge degen zor alǵysy dep qabyldaǵan jón", – dedi Prezident.
Marapattaý rásiminde «Zaǵiptar armany» múgedekter qoǵamdyq birlestiginiń is júrgizýshisi Áliia Dosmuhanova, «Osnovanie» jaýapkershiligi shekteýli seriktestiginiń ekskavatorshysy Vladimir Tsarik jáne «Qazsýshar» respýblikalyq memlekettik kásiporny Aqtóbe filialynyń sý berýdi retteýshisi Shyńǵystaý Ábdiev sóz sóiledi.
Budan keiin Memleket basshysy sý tasqynyna qarsy sharalarǵa belsene atsalysqan bir top qutqarýshyny, volonterler men qoǵam belsendilerin, áskeri qyzmetshiler men dárigerlerdi, qarapaiym jumysshylardy, sondai-aq kásipkerler men iri biznes ókilderin marapattady.
