2021 jylǵy 1 shildeden bastap Qazaqstanda Ákimshilik rásimdik-protsestik kodeks kúshine enedi. Kodeks aiasynda azamattarǵa qandai kepildikter beriledi? Ol qandai máselelerdi retteidi? QR Ádilet ministrligi Zańnama departamenti direktorynyń orynbasary Dýman Súleimenov osy suraqtarǵa egjei-tegjeili jaýap berdi, dep habarlaidy QazAqparat.
Kodeks azamattardyń múddesin qorǵaýǵa, onyń ishinde memlekettik organdardyń negizsiz ýájden qorǵaýǵa arnalǵan qaǵidattardy engizetinin atap ótken jón. Osylaisha, zańnamanyń barlyq túsiniksiz tustary azamattardyń paidasyna sheshiletin bolady.
«Ákimshilik rásimdik-protsestik kodeks azamattardyń naqty quqyqtaryn qorǵaý máselesin retteidi. Bul jerde áńgime ákimshilik aktiler týrasynda bolyp otyr. Ákimshilik aktiler degenimiz ne? Bul memlekettik organdardyń naqty azamatqa qatysty sheshimi. Memlekettik qyzmetter - bul basqarýdyń óte zor mán bererlik salasy. Mysaly, siz memleketten Jer kodeksi boiynsha ózińizge alýǵa bolatyn 10 sotyq jerdi alǵyńyz keledi delik. Iaǵni naqty sizge jer aktisin berý týraly ákimdiktiń sheshimi ákimshilik akt bolyp tanylady. Ákimshilik kodeks azamattardyń atalǵan quqyqtarynyń qorǵalýynyń negizgi kepildikterin belgileidi. Memlekettik organdar azamattar quqyqtaryn paidalanǵan kezde Ákimshilik rásimdik-protsestik kodeksindegi belgilengen barlyq mindetteme men printsipti saqtaýy kerek. Bul óte aýqymdy sala. Oǵan memlekettik qyzmetterdi kórsetý, júrgizýshi kýálikterin berý, kýálikter berý - azamattardyń naqty quqyqtarynyń qoldanysyna baǵyttalǵan barlyq is-sharalar kiredi», - dep túsindirdi spiker.
Azamattardyń memlekettik organdardan zań boiynsha alýǵa quqyǵy bar ielikti talap etýge quqyly ekenin umytpaý kerek. Bul talaptar kodekste belgilengen printsipterge sáikes kúshinde bolady.
«Bul bizdiń quqyqtyq júiedegi múlde jańa qujat. Qazirig tańda memlekettik qyzmetkerler men sýdialardy oqytý jumystary júrgizilýde. Kodekske sáikes sýdialar óte mańyzdy ról atqarady. Sebebi memlekettik organdardyń sheshimderiniń Ákimshilik rásimdik-protsestik kodekstiń talaptaryna sáikestigin dál sottar tekseredi. Jeke ákimshilik sottar qurylady. Bul sottar azamattar men memlekettik organdardyń, basqa uiymdardyń arasyndaǵy daýlardy qaraidy. Endigi kezekte sot baqylaýy memlekettik organdardyń sheshimine bailanysty bolmaq. Mysaly, «Atameken» ulttyq kásipkerler palatasy zańǵa sáikes jekelegen kásipkerlik sýbektilerine olardyń taýarlary otandyq óndiriste bolatyndyǵyn rastaityn sertifikattar beredi. Bul jaǵdaida UKP jańa engizilgen kodekstiń talaptaryna sáikes keledi. Olar sondai-aq kodekste kórsetilgen talaptardy oryndaýǵa májbúr bolady «, - dedi Ádilet ministrligi Zańnama departamenti direktorynyń orynbasary.
Dýman Súleimenovtiń aitýynsha osylaisha Ákimshilik rásimdik-protsestik kodeks azamattarǵa quqyqtyq kepildik beredi.
