Bilim jáne ǵylym vitse-ministri Rústem Biǵari jergilikti ákimdikterdegi bilim basqarmalary basshylaryna kompiýterlerdi satyp alýǵa bailanysty eskertý jasady, dep habarlaidy "Ult aqparat".
Jinalysta jergilikti atqarýshy organdardyń respýblikalyq biýdjet qarajaty esebinen kompiýterlik tehnikany satyp alýy jáne tehnikanyń jetkizilýi boiynsha máseleler qaraldy.
Rústem Biǵari Memleket basshysy qoiǵan mindet oryndalyp, birinshi qyrkúiekke deiin oqýshylarǵa qashyqtan oqý úshin qajet 500 myńǵa jýyq kompiýter jetkizilgenin atap ótti. Ákimdikter mektepterge kompiýterlik tehnikany satyp alý boiynsha jumysty áli de jalǵastyryp jatyr. Alaida, birqatar óńirde tehnikany jetkizý merzimderi, litsenziialyq qamtamasyz etý, kepildik berý jáne servistik qyzmet kórsetýge bailanysty problemalar týyndady.
«Biz bul máselelerdi apparattyq jinalysta birneshe ret qarastyrdyq. Bul – memleket qarajaty. Árbir kompiýterlik tehnikany satyp alý tikelei sizderdiń moiyndaryńyzda. Ashyqtyqty tolyq qamtamasyz etý qajet. Árbir ákimdik aldymen kompiýterlik tehnikany tekserip alǵan soń ǵana ony qabyldap, oqýshylarǵa jetkizýleri qajet. BǴM satyp alý protsesine qatyspaidy. Úkimet ákimdikterge qajet qarajatty jedel berip, jaǵdai jasady», – dep atap ótti bilim jáne ǵylym vitse-ministri Rústem Biǵari.
Bilim alýshylardy qajetti aqparattyq resýrstar jáne kompiýterlik tehnikamen qamtamasyz etýge bólingen qarajattyń igerilýi boiynsha sybailas jemqorlyq kórinisterin baqylaý ári boldyrmaý maqsatynda «Adaldyq alańy» jobalyq keńsesiniń ókilderi men Sybailas jemqorlyqqa qarsy is-qimyl agenttiginiń arnaiy monitoringtik toptarynyń músheleriniń qatysýymen monitoring júrgizý úshin 2020 jylǵy shilde aiynda BǴM Qazaqstan Respýblikasy Sybailas jemqorlyqqa qarsy is-qimyl agenttigine hat joldaǵanyn esterińizge sala keteiik.
«Iia, buryn-sońdy tehnikany osyndai kólemde satyp alý bolǵan emes. Árine, pandemiia men logistika máselelerine bailanysty kedergiler bolýy múmkin. Jetkizýshilerdiń mundai syltaýlaryna qaramai, olardan tiisti jumysty talap etýimiz kerek. Qolda bar barlyq mehanizmdi paidalaný kerek edi. Kepildik qyzmet kórsetý, sapa bolýy kerek», – dedi bilim jáne ǵylym vitse-ministri.
