Alash qairatkeri Ahmet Baitursynuly qazaq jerinde sotsialistik qoǵam qurý ideiasyn qabyldamaǵan. Bul týraly tarih ǵylymdarynyń doktory, professor Mámbet Qoigeldiev Almatyda ótken «Ahmet Baitursynuly – Ult ustazy» atty halyqaralyq ǵylymi-tájiribelik konferentsiia barysynda aitty, dep habarlaidy QazAqparat.
Ǵalymnyń sózinshe, Ahmet Baitursynuly qazaq qoǵamy bolshevikter oilastyrǵan qoǵamdyq qatynastar júiesine ótýge daiar emes dep sanaǵan.
«Ahmet Baitursynov Keńes biligin ultymyzdyń negizgi suranystaryna jaýap beretin bilik júiesi retinde moiyndamaǵan. Keńes úkimetiniń basshysy Leninge joldaǵan hatynda: «Qazaqtarǵa ne keregi anyq jáne túsinikti. Ǵasyrlar boiy imperiialyq ezgide bolǵan halyq óz biligi ózinde bolǵanyn qalaidy», - dep jazdy. Saiasi bilikke qatysty óz ustanymyn bildirýmen birge, Keńes úkimetinen ózi jaqsy bilmeitin elde radikaldy áleýmettik reformalardy júrgizbeýdi talap etti. Ókinishke qarai, Keńestik ortalyq tolyq negizdi bul eskertýlerge qulaq asqan joq», - dedi Mámbet Qoigeldiev.
Ol sondai-aq Ahmet Baitursynulynyń ómir joly - halyq ómirine jasalǵan qiianatqa tózbeýshilik jáne oǵan degen ymyrasyz qarsylyqtyń úlgisi ekenin atap ótti.
«Ol óziniń sanaly túrde tańdaǵan ómirlik joly týraly «El búginshil, meniki erteń úshin» dep jazdy. 1929 jyly Máskeýde ótken tergeý protsesinde ómirlik ustanymyn bylai bildiredi: «Meniń ómirlik ustanymym - qazaq halqynyń mádenietin kóterýge múmkin bolǵansha jaǵymdy jaǵdai týǵyzý. Óitkeni osy jol ǵana onyń ósip-ónýine kepildik bere alady. Osy is qandai ókimettiń qolynan kelse, men sol bilikke razy bolmaqpyn»,- degen bolatyn», - dedi professor Mámbet Qoigeldiev.
