Foto: industriall-union.org
Aqmolalyq Erlan men Miras Toqsanbaevtar úsh balany órtten qutqardy. Oqiǵa Birjan sal aýdanynyń Úlgi aýylynda bolǵan. Ákeli-balaly Toqsanbaevtar otqa oranǵan úidi kórip, oilanbastan kómekke umtylǵan. Bul týraly Ult.kz 24.kz-ke silteme jasap habarlaidy.
Ekeýlep júrip qoiý tútinniń ishinen balardy taýyp, úsheýin de syrtqa alyp shyqty. Úide bes bala bolǵan. Olardyń úlkeni 13-te bolsa, kenjesi bes jasta. Ata-anasy jumysta bolǵan. Tilsiz jaý endi tutana bastaǵanda úlken eki bala shyǵyp úlgergen. Al baýyrlaryn qutqarýǵa qoiý tútin men qyzyl jalyn kedergi bolǵan.
Erlan Toqsanbaev, aýyl turǵyny:
- Biz balalardy osy terezeden alyp shyqtyq. Men ishke kirgen kezde bir bala terezeniń jaqtaýyna jaqyndapty. Qalǵan ekeýi sol bólmeniń bir buryshynda otyr eken. Qazir menen bári ottyń ishine qalai qoryqpai kirdin dep surap jatyr. Balalardyń shyryldaǵan daýysyn estigen kezde janyp jatqan otqa qalai kirip ketkenimdi ózim de túsinbei qaldym. Meniń ornymda bolǵan kez kelgen adam osyndai qadamǵa barady dep oilaimyn.
Erlan Toqsanbaevqa balalardy syrtqa shyǵarýǵa uly kómektesken. Miras – bolashaq qutqarýshy. «Sondyqtan qatty qorqa qoimadym»,- deidi. Úidiń ishinde tórt gaz ballony bolǵan. Onyń ekeýin ákeli-balaly Toqsanbaevtar shyǵaryp úlgergen. Qalǵan bir ballondy órt sóndirýshiler shyǵarsa, bireýi sol jerde jarylǵan.
Miras Toqsanbaev, stýdent:
- Gaz ballonnyń jarylǵanyn birinshi ret kórdim. Asa qatty qorqynysh, úrei sezinbedim. Alaida aldaǵy qyzmetim úshin úlken tájiribe boldy. Árine, alǵystan basqa aitar sózim joq. Eń bastysy balalarym aman. Qazir olardyń jaǵdaiy qalypty. Azdap qorqyp qalǵany bolmasa.
Qazir órttiń shyǵý sebebi anyqtaldy.
Denis Shelkopliasov, Birjan sal aýdandyq TJ bóliminiń bastyǵy:
- Órttiń shyǵýyna pesh jaǵatyn bólmede ornalasqan sý sorǵysynyń symdarynyń tuiyqtalýy sebep bolǵan. Aldymen eden janǵan. Keiin qyzyl jalyn qabyrǵa arqyly tóbege deiin jetken.
Jumyla kótergen júk jeńil. Qazirgi ýaqytta aýyl turǵyndarǵy tilsiz jaýdan zardap shekken januiaǵa barynsha kómektesip jatyr. Tipti aýdan ortalyǵynan páter alyp berý bastamasy kóterildi. Al jaýaptylar beibit kúnniń batyrlaryn memlekettik marapatqa usyný rásimderin júrgizip jatyr.
