«Aq jol» partiiasy úshin parlamenttik oppozitsiia institýtyn engizý óte mańyzdy. Bul týraly partiia tóraǵasy, QR Parlamenti Májilisiniń depýtaty Azat Perýashev pikir bildirdi, dep habarlaidy QazAqparat.
«Memleket basshysynyń sailaý ótkizý týraly búgingi sheshimi biz úshin tosyn jaǵdai bolǵan joq. Asylynda, muny bári kópten kútti. Tipti sailaýdyń merziminen buryn emes, ádettegi merzimde ótýi de – sirek kezdesetin jaǵdai. Bul Májilistiń qazirgi quramyna tolyq merzimin aiaqtaýǵa múmkindik beredi. «Aq jol» partiiasy da kez kelgen jaýapty saiasi partiia sekildi bul sailaýǵa daiyn. Kez kelgen partiia aldyńǵy sailaý aiaqtalǵan soń, birden kelesi sailaý daiyndyǵyna kirisýi kerek. Jáne «Aq jol» partiiasy bul sailaýǵa 2016 jyldan beri daiyndalyp keledi. Qalai daiyndaldy? Eń aldymen Májilistegi, máslihattardaǵy depýtattarymyzdyń qyzmeti arqyly óz kózqarastarymyz ben ustanymdarymyzdy júzege asyrdyq. Búginde máslihattarda 50-ge jýyq depýtatymyz bar. Osy ýaqyt ishinde biz qorǵap kelgen qaǵidalar – ulttyq múdde máseleleri, naryqtyq reformalardy damytý jáne jeke kásipkerlikti qoldaý máseleleri, sybailas jemqorlyqqa qarsy kúres máseleleri, parlamentarizmdi, parlamentarizm institýttaryn qoǵamnyń kúndelikti ómirine engizý máseleleri qazir de elimizde suranysqa ie jáne ózekti dep esepteimiz», - dedi depýtat elordada tilshilerge bergen suhbatynda.
Onyń aitýynsha, Prezident Qasym-Jomart Toqaev óz Úndeýinde atap ótken novellalar «Aq jol» partiiasynyń kózqarastaryna sáikes keledi. Partiia úshin parlamenttik oppozitsiia institýtyn engizý jáne onyń saiasi quqyqtaryn iske asyrý kepildikterin bekitý óte mańyzdy.
«Ótken kezeńde «Aq jol» partiiasy óz tájiribesinde osy kepildikterdiń jetispeitinin sezindi, pikirtalas kezinde depýtattardyń mikrofonyn óshirip tastaityn. Endi Memleket basshysynyń tapsyrmasymen parlamenttik oppozitsiia institýty engizilgen soń, mundai jaittardyń bolmaitynyna senimdimin», - deidi depýtat.
Sonymen birge, A.Perýashev máslihattarǵa partiialyq tizim boiynsha sailaýdyń jergilikti jerdegi barlyq partiia ókilderine óz múmkindikterin iske asyrýǵa múmkindik beretinin atap ótti. Máslihattarda túrli partiia ókilderiniń paida bolýy pikirtalasty jandandyryp, qoǵamnyń barlyq toptarynyń múddelerin barynsha tolyq qamtylýyna kómektesedi.
Sóz sońynda depýtat áielder men jastar úshin 30 paiyzdyq kvota engizý boiynsha óz pikirin bildirdi.
«Aq jol» partiiasynyń parlamenttik fraktsiiasynda áielder 40 paiyzdy quraidy jáne bul eshqandai kvotasyz, partiianyń óz erkimen qamtylǵan. «Aq jol» partiiasynda adamdardy jynysy nemese jasy boiynsha usynbaidy», - dedi Azat Perýashev.
