"AQSh prezidenti Donald Tramp Resei prezidenti Vladimir Pýtinniń sailaýda jeńgeninen habardar", - dep málimdedi Aq úi baspasóz hatshysynyń orynbasary Hogan Gidli. Onyń aitýynsha, Tramp pen Pýtin telefonmen sóilesedi dep josparlanbaǵan. Tramptyń Pýtindi prezident bolyp sailanýymen quttyqtaǵany, ia quttyqtamaǵany da aitylmady.
Hogan Gidli "Reseidegi sailaý erkin ári ádil boldy ma?" degen saýalǵa jaýabynda Vashington Reseidegi sailaý nátijesine tańǵalmaitynyn aitty.
14 naýryz kúni Donald Tramp Ulybritaniia premer-ministri Tereza Meimen telefonmen sóilesken. El basshylary áńgimesinde Resei biligi Solsberide reseilik burynǵy agent Sergei Skripal men qyzyna qastandyq jasaý áreketine "anyq ári aiqyn jaýabyn berýi tiis" degen toqtam jasaǵan.
Aq úi Tramp Resei Bas barlaý basqarmasynyń burynǵy ofitseri Sergei Skripal men qyzy Iýliiany júike júiesin zaqymdaityn zatpen ýlap óltirmek bolý áreketine qatysty Ulybritaniia júrgizip jatqan tergeýge barynsha kómek kórsetýge ýáde bergenin málimdegen.
Sergei Skripal men qyzy Iýliia 4 naýryz kúni Ulybritaniianyń ońtústigindegi Solsberi qalasynda belgisiz zattan ýlanyp, aýrýhanaǵa túsken. Olar sodan beri aýrýhanada aýyr halde jatyr. Britandyq tergeýshilerdiń boljamynsha, Skripal men qyzy SSSR tusynda jasalǵan, júikeni jansyzdandyratyn qaýipti himiialyq zattan ýlanǵan. Resei syrtqy ister ministri Sergei Lavrov 13 naýryzda Skripaldi ýlaýǵa qatysy baryn joqqa shyǵarǵan.
