Halyqaralyq boks qaýymdastyǵyn (AIVA) Halyqaralyq Olimpiada komitetiniń músheliginen shyǵaryp jiberdi, dep habarlaidy olympic.kz HOK baspasóz qyzmetine silteme jasap.
Bul sheshim Halyqaralyq Olimpiada komitetiniń (HOK) múshesi Nenad Lalovich basqarǵan arnaiy Tergeý komissiiasynyń usynym boiynsha qabyldandy. Tekserý komissiiasy quramyna HOK múshesi Richard L. Karrion jáne Sportshylar komissiiasynyń jetekshisi Emma Terho engen.
HOK atqarýshy komiteti AIVA-daǵy qarjy, basqarý, etika jáne tóreshilik suraqtaryn sheshý maqsatymen 2018 jyldyń 30 qarashasynda arnaiy komissiia qurǵan bolatyn. Uiymdaǵy sheshimin tappaǵan máseleler 2017 jyly anyqtalyp, búginge deiin qatal túrde baqylandy. Biraq atalǵan suraqtardy oidaǵydai sheshý máselesi baiqalǵan joq.
HOK atqarýshy komiteti máseleni egjei-tegjeili teksere kele, boksty 2020 jylǵy Tokio Olimpiadasynyń sporttyq baǵdarlamasynda qaldyrýdy jón dep sheshti. Tokiodaǵy boks básekesi men barlyq irikteý syndary HOK bekitken negizgi qaǵidalar aiasynda ótýi tiis.
Eger joǵaryda atalǵan sheshim 2019 jyldyń maýsymynda ótetin HOK sessiiasynda maquldansa, 2020 jylǵy Tokio Olimpiadasynda bokstan 286 sportshy baq synaidy. 8 erler jáne 5 áielder salmaǵynda jarys ótkizilip, jeńimpazdar anyqtalady.
Sondai-aq, Atqarýshy komitet HOK múshesi jáne Halyqaralyq gimnastika federatsiiasynyń prezidenti Morinari Vatanabeniń basshylyǵymen maqsatty top qurdy. Onyń quzyreti tómendegidei:
1. Sporttyń barlyq salasyndaǵy genderlik teńdikti kóterý maqsatynda bokstan kelesi jarystardy ótkizý:
a. 2020 jyldyń qańtary men mamyry aralyǵynda ótetin bokstan 2020 jylǵy Tokio Olimpiadasyna irikteý jarystary;
b. Tokio Olimpiadasyndaǵy boks týrniri
2. 2019 jylǵy maýsym aiynyń sońyna deiin Tokio Olimpiadasyna irikteý júiesin ázirleý:
a. Erler men áielder arasyndaǵy salmaq dárejelerin anyqtaý;
b. Genderlik teńdikti kóterý maqsatynda boks básekesine kvota taratý;
v. Irikteý syndaryna kvota taratý talaptaryn ornatý.
HOK 2020 jyldyń qańtary men mamyry aralyǵynda ótetin olimpiadaǵa irikteý týrnirine arnalǵan jańa kúntizbe ázirleidi.
Al AIVA-ny HOK músheligine qaitarý máselesi 2020 jylǵy Tokio Olimpiadasynan keiin qaita qaralady.
«Búgingi másele sportshylar men jalpy bokstyń keleshegi úshin qabyldady. Biz sportshylardyń armanyna baltai shappai, olardyń 2020 jylǵy Olimpiada oiyndarynda óner kórsetkenin qalaimyz. Alaida, AIVA Tergeý komitetiniń sheshiminen keiingi saldar týraly oilaný qajet», - dedi HOK prezidenti Tomas Bah.
