Aitysker aqyn Maqsat Aqanovtyń toida dombyra ustap, kópshilikke arnaý aityp turǵan videosy áleýmettik jelide tarady, dep habarlaidy ult.kz.

Kadrlarda aqyn toi sahnasynda óner kórsetip, óleń arnap otyrǵany kórinedi. Alaida beinejazbanyń naqty qashan túsirilgeni ázirge belgisiz. 

Aqyn  elge ósiet aita almaitynyn, aitystan shettetilgenin tilge tiek etti. 

Ne jaǵdai boldy? 
 

Eske salaiyq, Maqsat Aqanov buǵan deiin Mańǵystaý oblysynyń Shaiyr aýylynda ótken aitystan keiin kópshiliktiń synyna qalǵan edi. Aitys aýyldyń 100 jyldyǵyna arnalǵan. Áleýmettik jelide aqynnyń sahnadaǵy áreketi men aitqan sózderinen úzindi taraǵan. Birqatar aqparat quraldary onyń sahnaǵa mas kúide shyqqanyn jazdy.

Osy oqiǵadan keiin Aitys aqyndary men jyrshy-termeshiler odaǵynyń tóraǵasy Amanjol Áltai aqynnyń aldaǵy alty ai boiy Odaq uiymdastyratyn resmi aitystar men sharalarǵa qatysa almaitynyn málimdedi. 

Aita keteiik, Shaiyr aýylyndaǵy shara Aitys odaǵynyń resmi kúntizbesine enbegen. Ony jergilikti azamattar men jeke demeýshiler uiymdastyrǵan. Soǵan qaramastan, Odaq aqynnyń sahnadaǵy áreketine bailanysty tártiptik sheshim qabyldaǵan. 

Maqsat Aqanov kim?

Maqsat Asylmuratuly Aqanov - Qaraǵandy oblysynan shyqqan belgili aitysker aqyn. Ol aitys sahnasynda 25 jyldan beri óner kórsetip keledi.

Aqyn 2018 jyly ótken «Altyn dombyra» respýblikalyq aitysynda úshinshi oryn alǵan. Al 2023 jyly «Altyn dombyra» dodasynda bas júldeni ielendi. Ol kezde jarysqa elimizdiń ár óńirinen 16 aqyn qatysqan.

2025 jyly Maqsat Aqanov Semeide Abaidyń 180 jyldyǵyna arnalǵan «Adamzattyń Abaiy» respýblikalyq aitysynda da bas júldege ie boldy.