Arshaly aýdanynda Ulttyq ulannyń áskeri qyzmetshileri men Qylmystyq-atqarý júiesi departamentiniń qyzmetkerleri QAJ mekemesine tyiym salynǵan zatty jetkizý áreketin anyqtady, dep habarlaidy ult.kz.
Mekeme aýmaǵyna kirmek bolǵan «Gazel» avtokóligin tekserý kezinde «Aiza» atty qyzmettik it artqy kórinis ainasynyń oń jaq tusynan kúmándi zatty sezgen.
Tereńdetilgen tekserý barysynda aina qýysynyń ishinen jasyrylǵan orama tabyldy. Onyń ishinde jasyl tústi, ózine tán iisi bar zat bolǵan. Tárkilengen zattyń naqty quramy anyqtalyp jatyr.
Tekserý tobynyń quramynda efreitor Timýr Qojabekov pen kinolog-maman, kishi serjant Bereke Dónenbai bolǵan.
Qazir atalǵan fakti boiynsha tekserý júrgizilip, oqiǵanyń mán-jaiy men quqyq buzýshylyqqa qatysy bar tulǵalar anyqtalýda. Jaǵdai quzyrly organdardyń baqylaýynda.
