Foto: kolesa.kz
Energetika vitse-ministri Erlan Aqkenjenov AI-95 markaly benzinniń tapshylyǵyn boldyrmaý úshin qandai sharalar qabyldanyp jatqanyn aitty, - dep habarlaidy QazAqparat.
Vedomstvoda ótken brifingide BAQ ókilderi vitse-ministrden AI-95 markaly benzinniń tapshylyǵy qalai sheshiletinin surady.
«Búgingi tańda Resei Federatsiiasymen 40 myń tonna (AI-95 markaly – red.) benzin jetkizý týraly indikativti kelisim bar. Biz Resei Federatsiiasy Energetika ministrligine osy indikativti balansty 70 myń tonnaǵa ulǵaitý týraly hat joldadyq. Iaǵni, bul - shamamen 110 myń tonna bolady degen sóz. «PETROSUN» kompaniiasynyń qajetti benzindi jetkizbeýi týraly suraǵyńyzǵa kelsek, kelisimshart Resei Energetika ministrliginiń ótinishi boiynsha bir aiǵa shegerildi. Ózderińiz bilesizder, olarda AI-95 markaly benzin men dizel boiynsha jaǵdai ońai bolmai tur. Reseidiń ońtústik óńirlerinde tutas bir aimaqtarda benzin men dizel joq. Tipti, ol óńirlerde egin jinaý naýqany úzilip qalýy múmkin. Biz ol áriptesterimizdi túsinemiz», - dep jaýap berdi ministrdiń orynbasary.
Onyń aitýynsha, Reseiden ákelinetin benzin kólemin ulǵaitý sharasy saqtyq úshin ǵana jasalyp otyr.
«Bul jerde AI-95 benzininiń ózimizdegi óndirisi qazan aiynda 65 myń tonna kóleminde bolatynyn aitý kerek. Jospar boiynsha 80 myń tonna tutynýymyz kerek. Biraq qyrkúiek aiynyń qaldyqtaryn qosyp eseptesek, boljam boiynsha, qazan aiyn tapshylyqsyz ótkize alamyz.
Energetika ministrliginiń boljamy boiynsha, AI-95 markaly benzinniń tapshylyǵy bolmaý kerek», - dedi Erlan Aqkenjenov.
