فوتو: kolesa.kz
ەنەرگەتيكا ۆيتسە-مينيسترٸ ەرلان اقكەنجەنوۆ اي-95 ماركالى بەنزيننٸڭ تاپشىلىعىن بولدىرماۋ ٷشٸن قانداي شارالار قابىلدانىپ جاتقانىن ايتتى, - دەپ حابارلايدى قازاقپارات.
ۆەدومستۆودا ٶتكەن بريفينگٸدە باق ٶكٸلدەرٸ ۆيتسە-مينيستردەن اي-95 ماركالى بەنزيننٸڭ تاپشىلىعى قالاي شەشٸلەتٸنٸن سۇرادى.
«بٷگٸنگٸ تاڭدا رەسەي فەدەراتسيياسىمەن 40 مىڭ توننا (اي-95 ماركالى – رەد.) بەنزين جەتكٸزۋ تۋرالى ينديكاتيۆتٸ كەلٸسٸم بار. بٸز رەسەي فەدەراتسيياسى ەنەرگەتيكا مينيسترلٸگٸنە وسى ينديكاتيۆتٸ بالانستى 70 مىڭ تونناعا ۇلعايتۋ تۋرالى حات جولدادىق. ياعني, بۇل - شامامەن 110 مىڭ توننا بولادى دەگەن سٶز. «PETROSUN» كومپانيياسىنىڭ قاجەتتٸ بەنزيندٸ جەتكٸزبەۋٸ تۋرالى سۇراعىڭىزعا كەلسەك, كەلٸسٸمشارت رەسەي ەنەرگەتيكا مينيسترلٸگٸنٸڭ ٶتٸنٸشٸ بويىنشا بٸر ايعا شەگەرٸلدٸ. ٶزدەرٸڭٸز بٸلەسٸزدەر, ولاردا اي-95 ماركالى بەنزين مەن ديزەل بويىنشا جاعداي وڭاي بولماي تۇر. رەسەيدٸڭ وڭتٷستٸك ٶڭٸرلەرٸندە تۇتاس بٸر ايماقتاردا بەنزين مەن ديزەل جوق. تٸپتٸ, ول ٶڭٸرلەردە ەگٸن جيناۋ ناۋقانى ٷزٸلٸپ قالۋى مٷمكٸن. بٸز ول ەرٸپتەستەرٸمٸزدٸ تٷسٸنەمٸز», - دەپ جاۋاپ بەردٸ مينيستردٸڭ ورىنباسارى.
ونىڭ ايتۋىنشا, رەسەيدەن ەكەلٸنەتٸن بەنزين كٶلەمٸن ۇلعايتۋ شاراسى ساقتىق ٷشٸن عانا جاسالىپ وتىر.
«بۇل جەردە اي-95 بەنزينٸنٸڭ ٶزٸمٸزدەگٸ ٶندٸرٸسٸ قازان ايىندا 65 مىڭ توننا كٶلەمٸندە بولاتىنىن ايتۋ كەرەك. جوسپار بويىنشا 80 مىڭ توننا تۇتىنۋىمىز كەرەك. بٸراق قىركٷيەك ايىنىڭ قالدىقتارىن قوسىپ ەسەپتەسەك, بولجام بويىنشا, قازان ايىن تاپشىلىقسىز ٶتكٸزە الامىز.
ەنەرگەتيكا مينيسترلٸگٸنٸڭ بولجامى بويىنشا, اي-95 ماركالى بەنزيننٸڭ تاپشىلىعى بولماۋ كەرەك», - دەدٸ ەرلان اقكەنجەنوۆ.
