Elimizdiń agroónerkásip salasynda jańa saqtandyrý júiesi iske qosyldy, dep habarlaidy "Ult aqparat" Aýyl sharýashylyǵyn qarjylai qoldaý qorynyń baspasóz qyzmetini silteme jasap.
Jańa saqtandyrý júiesiniń operatory «QazAgro» holdinginiń enshiles kompaniiasy – Aýyl sharýashylyǵyn qarjylai qoldaý qory. 2004 jyldan beri Ósimdik sharýashylyǵyn mindetti saqtandyrý júiesi jumys istep kelgen bolatyn. Al, myna jańa júie odan basqasha bolmaq.
«Birinshiden, agroónerkásip keshenindegi saqtandyrý endi erikti túrde bolady.
Ekinshiden, salalarǵa shekteý joq. Agrarlyq sektordyń kez kelgen baǵyty saqtandyrylady.
Úshinshiden, saqtandyrý syiaqylaryn memleket sýbsidiialaidy. Bul aýyl sharýashylyǵy taýarlaryn óndirýshilerdi yntalandyrýǵa jáne saqtandyrý shartyn jeńildetýge baǵyttalǵan. Saqtandyrý syiaqy somasynyń 50 %-yn memleket sýbsidiialaidy. Ol úshin biyl respýblikalyq biýdjetten 2,5 mlrd teńge bólindi» delingen habarlamada.
Jańa júieni ázirleý kezinde ósimdik sharýashylyǵyndaǵy mindetti saqtandyrýdyń problemalyq máseleleri eskerildi.
«Máselen, aýyl sharýashylyǵy taýaryn óndirýshilerdiń múddelerin qorǵaý maqsatynda júiede Qazaqstan Respýblikasynyń Qarjy naryǵyn retteý jáne damytý jónindegi agenttiktiń litsenziiasy bar saqtandyrý kompaniialary ǵana jumys istei alady», - deidi «Aýyl sharýashylyǵyn qarjylai qoldaý qory» AQ Basqarýshy direktory – basqarma múshesi Asqar Qaliev.
Jańa júiede álemdik saqtandyrý naryǵynda «A» reitingi bar úsh halyqaralyq qaita saqtandyrý kompaniiasy jumys isteitin boldy. Olar otandyq kompaniialar saqtandyratyn táýekelderdi qaita saqtandyrady. Bul saqtandyrý táýekelderi týyndaǵan jaǵdaida kepildi tólemderdi qamtamasyz etýge múmkindik beredi.
Shart jasasýdan bastap tólemmen aiaqtalatyn barlyq rásimder elektrondy tsifrlyq qoltańba arqyly Qoldau.kz elektrondy platformasynda júrgiziledi. Protsesterdi avtomattandyrý adami faktordy azaitady jáne jumystyń ashyqtyǵyn qamtamasyz etedi.
«Búgingi tańda Aýyl sharýashylyǵyn qarjylai qoldaý qory topyraqtaǵy ylǵaldyń indeksine negizdelgen saqtandyrý ónimderin bekitti. Saqtandyrýǵa jatatyn dándi daqyldar bidai, arpa, suly, júgeri. Al, maily daqyldar kúnbaǵys, raps, zyǵyr ónimderi. Monitoringti júzege asyrý úshin aqparat Jerdi qashyqtan zondtaý kózderinen alynady. Ylǵal deńgeiiniń monitoringi turaqty negizde júrgiziledi jáne saqtandyrý jaǵdaiynyńderekteri avtomatty túrde tirkeledi», - deidi Asqar Qaliev..
Saqtandyrý jaǵdaiy týyndaǵany týraly Qoldau.kz júiesindegi jeke kabinetine nemese jeke elektrondy poshtasyna kelgen habarlamany alǵannan keiin aýyl sharýashylyǵy ónimin óndirýshi tólem jasaityn saqtandyrý kompaniiasyna ótinish beredi.
Burynǵy júiedegi alynǵan derekter boiynsha saqtandyrýǵa qatysty jaǵdailardyń 60 %-dan astamy qurǵaqshylyqqa qatysty boldy. Osyǵan bailanysty ónimdi qurǵaqshylyqtan saqtandyrý erekshe mańyzǵa ie. Sondai-aq, egis naýqanynyń aiaqtalý merzimi de eskeriledi.
Ylǵaldyń jetispeý qaýpinen saqtandyrý úshin aýyl sharýashylyǵy taýaryn óndirýshiler biyl 15 maýsymǵa deiin saqtandyrý shartyn jasasýy qajet.Saqtandyrý kezeńi 3 aidy qamtidy. Iaǵni,15 mamyrdan 15 tamyzǵa deiingi aralyq esepke alynady.
Ylǵaldyń shamadan tys bolýyna qatysty saqtandyrý kelisimshartyn 15 tamyzǵa deiin bekitý qajet. Saqtandyrý 2020 jyldyń 15 tamyzynan 15 qyrkúiegine deiingi aralyqta júrgiziledi.
Aldaǵy ýaqytta agroónerkásip keshenindegi saqtandyrý ónimderiniń naryqtaǵy qajettiligi eskerilip, tizimi keńeitiletin bolady.
