Sybailas jemqorlyqqa qarsy is-qimyl agenttiginiń tóraǵasy Oljas Bektenov keshe Qairat Satybaldynyń ustalýyna qatysty pikir bildirdi, dep habarlaidy QazAqparat.
«Qylmystyq is «Qazaqtelekom» AQ-nyń qarajatyn jymqyrý faktisi boiynsha tergelip jatyr. Keshe osy boiynsha tiisti aqparat taratyldy. Qazirgi kezde qarajat somasy anyqtalyp jatyr, ol boiynsha birneshe epizod qamtylǵan. Osy oraida saraptama júrgizilgennen keiin, biz bul somany jariia etemiz. Degenmen osy iske qatysty milliardtaǵan qarajat bar dep aita alamyn», - dedi Bektenov Májilistiń jalpy otyrysynan keiin tilshilerdiń saýalyna jaýap bere otyryp.
Sonymen qatar ol Satybaldy áýejai aýmaǵynda ustalǵanyn aitty.
«Ol Almaty áýejaiynyń aýmaǵynda ustaldy. Ustalǵannan keiin ýaqytsha ustaý izoliatoryna qamaldy. Tergeý amaldary barysynda qaraimyz, bultartpaý sharasyn sot aiqyndaidy», - dedi agenttik basshysy.
Eske salaiyq, buǵan deiin qylmys jasady degen kúdikpen Qairat Satybaldyuly ustalyp, ýaqytsha ustaý izoliatoryna qamalǵany habarlanǵan bolatyn.
