© Pixabay / Markus Distelrath
Energetika ministri Almasadam Sátqaliev Aqordada BAQ ókilderine bergen suhbatynda frantsiialyq Electricite de France kompaniiasymen Qazaqstanda AES salý máselesi boiynsha kelissóz júrgizýge daiyn ekenin málim etti, dep habarlaidy Kazinform agenttigi.
«Frantsiia delegatsiiasynyń saparyna kelsek, Energetika ministrligi boiynsha birshama aýqymdy máseleni talqylaý kózdelgen. Birinshi másele - Total Energy kompaniiasymen qýaty 1 GVt bolatyn jel parkin salý týraly kelisim. Ol parktiń elektr qýatyn saqtaityn qurylǵysy da bolady. Buǵan deiin jahandyq jylynýǵa qarsy kúres, atalǵan jobaǵa investitsiia tartý jóninde úkimetaralyq kelisimge qol qoiylǵan bolatyn. Jalpy Májiliste osy kelisimdi ratifikatsiialaý jumysyn bastap kettik», - dedi ol Frantsiia jáne Qazaqstan prezidentteriniń Aqordadaǵy kezdesýi aldynda.
Sondai-aq, ministr frantsiialyq kompaniianyń Qazaqstanda AES salý múmkindigine toqtaldy.
«Osy sapar aiasynda bizdiń EDF (Electricite de France -red.) kompaniiasymen seriktestigimiz talqylanady. Qazir olar General Electric-tiń atom elektr stansalaryna arnalǵan týrbinalar óndirisine bailanysty aktivterin satyp alý kelisimin aiaqtap jatyr. Kompaniianyń bul salada biregei tájiribesi bar. Frantsiiada olar 50-den astam reaktordy iske qosqan. Shetelde de salady. Ózderińiz biletindei, EDF Qazaqstanda AES salýy múmkin kompaniialardyń short-paraǵyna engen. Eger Frantsiia tarapy kelissóz jóninde bastama bildirse, biz ony júrgizýge daiynbyz», - dedi Almasadam Sátqaliev.
Eske salaiyq, búgin Frantsiia Prezidenti Emmaniýel Makron Qazaqstanǵa resmi saparmen keldi.
Sapar aiasynda eki el basshylary saýda-ekonomikalyq, investitsiialyq jáne energetikalyq yntymaqtastyqty nyǵaitý, sondai-aq halyqaralyq jáne óńirlik kún tártibindegi máselelerdi talqylaidy dep josparlanǵan.
