Ádilhan Erjanovtyń nýar janrynda túsirilgen «Goliaf» atty jańa kórkem filmi 79-shy Halyqaralyq Venetsiia kinofestivaliniń Orizzonti Extra («Jańa kókjiekter») baǵdarlamasyna qatysady. Bul týraly Venetsiia biennale kórkemdik jetekshisi Alberto Barbera onlain formatta ótken baspasóz otyrysynda málim etti, dep habarlaidy QazAqparat.
«Goliaf» filminde bilik pen baǵyný tabiǵaty zertteledi. Kek alý ideiasy (bir jaǵynan múmkin bolmasa da) jáne úlken tulǵalar men kishkentai adamdardyń arasyndaǵy qaqtyǵystar týraly siýjet burynnan beri oida bolatyn. Eki jyl ishinde stsenariidi birneshe ret ózgerte otyryp, osy máselelerdi kóterýge tyrystym. Filmde art pen janr arasynda ózindik shegi bar, sondyqtan muny keibireýler túsinbeýi múmkin, alaida joǵary baǵalaityndar bolady degen senim bar», - deidi filmniń rejisseri ári stsenarii avtory Ádilhan Erjanov.
«Qazaqfilm» kinostýdiiasynyń qatysýymen, qazaqstandyq Short brothers jáne Changepoint kinokompaniialary, sondai-aq reseilik All Media (a START Company) men «Forest-Film» kompaniialary birlese túsirgen kinotýyndynyń oqiǵasy Qaratas aýylynda órbidi. Óziniń qataldyǵymen jáne albyrttyǵymen belgili Bólegen esimdi jigit aýyl turǵyndaryn úreide ustaidy, olardy baspanamen, jumyspen qamtamasyz etedi. Oǵan qarsy shyqqan jandardy aiaýsyz jaýapqa tartady. Qaratas aýylyndaǵy qylmys týraly politsiiaǵa jetkizbek bolǵan Arzýdyń áieli búkil otbasyn qaterge tigedi.
Filmniń túsirý jumystary byltyr jaz aiynda Almaty tóńireginde ótti. Basty rólderdi qazaqstandyq belgili akterler: Berik Aitjanov, Daniiar Alshynov, Almira Tursyn jáne Erken Gýbashev somdady. Sondai-aq, filmge reseilik akterler Dmitrii Chebotarev jáne Aleksandra Revenko tústi.
Atalǵan kinovestival 31 tamyz ben 10 qyrkúiek aralyǵynda Lido aralynda ótedi. Festival uiymdastyrýshylary biyl bul baiqaýǵa jeti film qatysatynyn habarlady. Orizzonti Extra baǵdarlamasy kino álimine jańalyq alyp kelgen filmderdi kórsetip qana qoimai, álemge jańa rejisserlerdi tanystyrady. Bul baǵdarlama sheńberinde túrli janrda jáne ár túrli formatta túsirilgen filmderdiń ishinen úzdik týyndyny kórermenderden quralǵan qazylar alqasy anyqtaidy.
Aita ketsek, Ádilhan Erjanovtyń «Sary mysyq» atty filmi 77-shi Venetsiia kinofestivaliniń «Kókjiekter» baǵdarlamasyna qatysqan bolatyn.
Sondai-aq, Ádilhan Erjanovtyń filmderi Kann, Lokarno, Rotterdam, Briýg, Stokgolm, Pýsan syndy bedeldi festivalderde kórsetilip, kóptegen júldelerge ie bolǵan. Ol 2019 jyly «Qap-qara adam» filmi úshin Asia Pacific Screen Awards (Aziialyq «Oskar» atanǵan) júldesin alǵan alǵashqy qazaqstandyq rejisser. Halyqaralyq Kann kinofestivali sheńberinde Erjanovtyń eki birdei filmi – «Erekshe kózqaras» baǵdarlamasynda «Álemniń erke enjarlyǵy» («Laskovoe bezrazlichie mira») jáne «Úkili Kamshat» («Spetsialnyi pokaz») kinotýyndylary kórsetilgen bolatyn.
