QR Parlamenti Májilisiniń kýlýarynda Marat Beketaev óziniń qyzmettik kóligin aiyrbastaǵysy kelmeitinin aitty, dep habarlaidy Baq.kz tilshisi.
Ádilet ministri barlyq ministrler siiaqty QR Prezidentiniń Is-basqaramasynan qyzmettik kólikti jalǵa alady. Ol jalǵa berilgen qyzmettik kólikke qansha aqsha tóleitini jónindegi aqparat qoljetimdi ekenin atap ótti.
«Ministrlerdiń memlekettik biýdjet esebinen beriletin qyzmettik kólikpen jumysqa barýy qalypty jaǵdai. Jeke kólik – bul jeke aqparat. QR Prezidentiniń Is-basqaramasynan ministrlerdiń kólikti jalǵa alatyny siiaqty men de qyzmettik kólikti jalǵa aldym. Onyń markasy – Leksýs. Jalǵa alý baǵasy belgilengen. Bul – aqparat ashyq. Men bul suraqqa nege sonsha mán berip otyrǵandaryńyzdy túsinbedim», - dedi ol.
Sondai-aq jýrnalister ministrge «sizdiń qyzmettik kóligińiz qymbat emes pe, Qazaqstanda jasalǵan avtokólikke otyrǵyńyz kelmei me?» degen saýal joldady.
«Meniń qyzmettik kóligim sonshalyqty qymbat emes. Eger biz Astananyń aýa raiyn esepke alsaq, men qazir ministrler velosipedke kenetten otyryp ketedi dep oilamaimyn», - dedi Marat Beketaev BAQ ókilderiniń suraǵyna.
Osy oraida ministr atalǵan máselege bailanysty jýrnalisterdi shý shyǵarmaýǵa shaqyrdy. Onyń aitýynsha, bul máseleni BAQ ókilderi ádeii ýshyqtyryp júr eken.
«Meniń kóptegen áriptesterimniń otandyq avtopromnyń ónimine kóńilderi tolady. Olar otandyq kólikterdi paidalanýda. Men taǵy da sizderdi atalǵan másele jóninde shý shyǵarmaýǵa shaqyramyn. Bul jerden «intriga» izdeýdiń qajeti joq», - dep túiindedi sózin Ádilet ministri.
