«Adal» saiasi partiiasy Shymkent qalasy men Túrkistan oblysynda filialdaryn tirkedi. Bul týraly QR Ádilet vitse-ministri Azamat Ámirǵaliev aitty, dep habarlaidy "Ult aqparat".
«QR Azamattyq kodeksiniń 42-babyna sáikes, zańdy tulǵalar ataýyn ózgertken kezde memlekettik tirkeýden qaitadan ótýi qajet. Olardyń filialdary da eseptik qaita tirkelýi tiis. Osy jyldyń 11 qarashasynda «Birlik» saiasi partiiasy «Adal» saiasi partiiasy retinde memlekettik qaita tirkeýden ótti. «Adal» saiasi partiiasynyń barlyq 17 filialy tiisti eseptik qaita tirkeýge alyndy. Osylaisha olardyń barlyq 17 óńirde filialy bar», - dedi ol Ortalyq sailaý komissiiasy otyrysynda.
Sonymen qatar Azamat Ámirǵaliev Qazaqstannyń kommýnistik halyq partiiasy osy jyldyń 12 qazanynda Qazaqstannyń halyq partiiasy retinde qaita tirkeýden ótkenin atap ótti. Barlyq óńirlerdegi filialdary da tirkelgenin aitty.
«Búgingi kúni partiialardy tirkeý protsedýrasy aiaqtaldy», - dedi Ádilet vitse-ministri.
Osy rette Ortalyq sailaý komissiiasynyń tóraǵasy Berik Imashev «Adal» saiasi partiiasynyń óńirlik filialdaryna qatysty aqparatty naqtylaýdy ótindi.
«Siz «Adal» saiasi partiiasynyń barlyq óńirde filialy bar deisiz. Shymkent qalasy men Túrkistan oblystyq filialdaryna qatysty aqparat berseńiz. Buǵan deiin atalǵan óńirlerde filialdary bolmaǵan edi», - dedi ol.
Óz kezeginde QR Ádilet vitse-ministri «Adal» saiasi partiiasy Shymkent qalasy men Túrkistan oblysynda filialyn tirkegendigin atap ótti.
